Seanca në GJKKO, Balluku dhe dy vartësit dalin nga gjykata pas 5 orësh

Pas më shumë se pesë orësh seancë në GJKKO, zëvendëskryeministrja  e pezulluar Belinda Balluku ka dalë sot nga ambientet e gjykatës së posaçme, së bashku me Gentian Gjylin dhe Erald Elezin, dy vartësit e saj.

Balluku doli e para dhe nuk dha asnjë deklaratë për mediat. Pak minuta më vonë u larguan edhe Gjyli dhe Elezi, të cilët kishin qenë në seancë për t’u njohur me akuzat dhe masat e sigurisë.

GJKKO ka vendosur të lërë në fuqi masat e sigurisë për të tre të hetuarit.

Numri dy i qeverisë Rama, u pezullua nga detyra dy ditë më parë me vendim të GJKKO-së dhe iu ndalua dalja jashtë vendit.

Ajo është marrë zyrtarisht e pandehur prej datës 31 tetor 2025 dhe akuzohet për “shkelje të barazisë në tendera dhe ankande publikë”, në bashkëpunim me vartësit e saj, në procedurën për ndërtimin e Tunelit të Llogarasë.

SPAK ka ngritur ndaj saj edhe një akuzë të dytë, që lidhet me dyshime për abuzime me tendera në lotin 4 të Unazës së Madhe.