Masakra e Lushnjës, Gjykata e Lartë konfirmon vendimin për dy burgimet e përjetshme

Gjykata e Lartë ka rrëzuar rekursin e Orges Bilbilit dhe Anterio Kaloshit, duke lënë në fuqi dënimin me burgim të përjetshëm për masakrën e vitit 2017 në Lushnjë.

Pas vendimit, ka reaguar avokati i tyre, Detar Hysi, i cili akuzon Gjykatën e Lartë se vendimi “cënon sigurinë kombëtare, të jetës dhe të pronës”.

Bilbili, Kaloshi dhe Laert Haxhiu akuzohen për masakrën ku u vranë Zamir Latifi dhe Jurgen Hoxha, ndërsa u plagosën Marjus Xhepexhiu dhe Bujar Turku.

Për të njëjtën ngjarje, Haxhiu është dënuar me burgim të përjetshëm në dy shkallë dhe rekursi i tij në Gjykatën e Lartë pritet të shqyrtohet. Haxhiu u ekstradua më 3 korrik të vitit të kaluar nga Greqia, një vit pas arrestimit në shtetin fqinj.

Hetimet ndaj grupit nisën pasi Artan Tafani, i arrestuar për grabitje në zonën e Astirit, u bë bashkëpunëtor i drejtësisë dhe tregoi të paktën gjashtë ngjarje kriminale ku, sipas tij, Laert Haxhiu kishte qenë organizator, pjesëmarrës ose porositës.

Anterio Kaloshi u arrestua më 13 gusht 2020, pasi bashkë me disa persona të tjerë qëlloi me armë zjarri në drejtim të hotel “Voloreka” në Pogradec, ndërsa ishte shpallur në kërkim për masakrën e Lushnjës.

Ndërkohë, Orgest Bilbili u kap më 10 prill 2020 në zonën e Xhamllikut në Tiranë dhe u plagos nga policia, pasi tentoi të largohej.

Sipas hetuesve, shënjestër ishte nipi i Aldo Bares, Xhulio Shkurti, i cili arriti t’u shpëtojë plumbave në lokal, pasi u ngrit nga tavolina pak minuta më herët.