U arrestua për trafikim droge në Vërmicë/ 26 vjeçarja ndërron jetë në urgjencë, pas intervistimit nga policia në Prizren

Kosovë&Rajon

U arrestua për trafikim droge në Vërmicë/ 26 vjeçarja

E ndaluar nga policia e Kosovës për trafik kokaine, por 26 vjeçarja Blerta Hyseni humbet jetën gjatë intervistimit brenda stacionit policior në Prizren.

Hyseni u ndalua së bashku me shtetasin Adnan Podvoricën, i lindur në vitin 1978, gjatë një operacioni të njësive të antidrogës në pikën kufitare të Vërmicës më 15 nëntor, kur hetuesit e antidrogës në Prishtinë siguruan informacione operative se dyshja kishte udhëtuar drejt Kukësit, në Shqipëri, me dyshimin se do të furnizohej me kokainë.

Rreth orës 18:00, policia ndaloi mjetin me të cilin udhëtonin, një BMË X6 të kuqe, menjëherë pasi kishte hyrë në territorin e Kosovës.

Në timon ishte Podvorica, ndërsa në ulësen e pasagjerit ndodhej Hyseni.

Kontrolli i detajuar i veturës përfundoi me zbulimin e 105.7 gramëve substancë të dyshuar kokainë. Gjithashtu, u sekuestruan dy fishekë të kalibrit 9 mm, dy telefona iPhone dhe vetura.

Pas konsultimit me Prokurorinë Themelore në Prizren, u dha urdhër që të dy personat të intervistoheshin si të dyshuar për veprën penale që lidhet me blerjen, posedimin, shitjen ose shpërndarjen e paautorizuar të narkotikëve dhe më pas të ndaloheshin për 48 orë.

Gjatë përgatitjeve për intervistimin e Blerta Hysenit, në praninë e avokatit të saj mbrojtës, asaj iu përkeqësua papritur gjendja shëndetësore. duke shfaqur simptoma të dyshuara të ngjashme me kriza epileptike.

Policia kërkoi menjëherë ndihmën e emergjencës, ndërsa ekipet mjekësore mbërritën në stacion dhe i ofruan ndihmën e parë. Më pas, Hyseni u transportua në Emergjencë për trajtim të mëtejshëm.

Rreth orës 01:30 pas mesnatës, Blerta Hyseni ndërroi jetë.

Vdekja e saj ka hapur një hetim të veçantë nga hetuesit rajonalë në Prizren, ndërsa shkaku i vdekjes mbetet për t’u përcaktuar nga organet kompetente.

Ndërkohë, hetimet për substancën e dyshuar narkotike të sekuestruar në Vërmicë po vazhdojnë nga njësia e antidrogës në bashkëpunim me Prokurorinë Themelore në Prizren.

ME TE LEXUARAT

NA SHKRUAJ

Portali Lajmifundit sjell Lajme nga Shqipëria, rajoni dhe bota në kohë rekord. Ju lutemi na kontaktoni nëse doni të kontribuoni me informacione të vlefshme për publikim në portalin tonë.

Kliko për më shumë informacion