Teleskopi 1.5 tonësh pritet të bjerë sot në Tokë, zbulohen zonat ku mund të përfundojnë mbetjet

Një teleskop hapësinor i NASA-s, që ka qëndruar në orbitë për më shumë se dy dekada, pritet të rikthehet në atmosferën e Tokës të mërkurën, ndërsa disa pjesë të tij mund t'i mbijetojnë temperaturave ekstreme.

Bëhet fjalë për observatorin Swift, me peshë rreth 1.5 tonë, i lëshuar në hapësirë në vitin 2004 për të studiuar shpërthimet e rrezeve gama dhe fenomene të tjera kozmike.

Sipas NASA-s, teleskopi pritet të hyjë në atmosferë rreth orës 03:30, sipas kohës lindore amerikane, me një pasiguri prej 11 orësh.

Harta e trajektores tregon se mbetjet e mundshme mund të bien në zona të Amerikës Latine, Afrikës, Azisë Jugore dhe Australisë Veriore, si edhe në oqeane.

Europa dhe Shtetet e Bashkuara ndodhen jashtë brezit të mundshëm të rënies.

Megjithatë, vendndodhja e saktë nuk mund të përcaktohet ende.

NASA kishte shpenzuar 30 milionë dollarë për një mision shpëtimi, por anija e dërguar për të ngritur orbitën e teleskopit pësoi probleme teknike.

Pas 21 vitesh aktivitet, Swift ka regjistruar mbi 2 mijë shpërthime të rrezeve gama dhe 1,400 shpërthime yjesh.

Rritja e aktivitetit diellor përshpejtoi uljen e orbitës së tij, duke e bërë të pashmangshëm rikthimin në atmosferën tokësore.