Skandal në Francë, fëmijët po rekrutohen për tortura dhe vr'asje, mesazhi i fshehtë në dr'ogë zbulon bandën

Një shënim i vogël i fshehur në një qese droge zbuloi një histori tmerri në Marsejë të Francës. Një grua, e cila sapo kishte blerë hashash në një lagje të qytetit, vendosi të lajmëronte policinë pasi shitësi i ri i kishte dhënë fshehurazi një letër ku shkruhej: “Na mbajnë të burgosur dhe kemi nevojë për ndihmë. Jemi 15 vjeç”.

Pas këtij mesazhi fshihej historia e dy adoleshentëve që kishin hyrë në botën e trafikut të drogës me shpresën për të fituar para, por kishin përfunduar në duart e një bande kriminale, ku u torturuan, u rrahën dhe u shfrytëzuan seksualisht.

Hetimi i BBC-së zbulon mënyrën se si organizatat kriminale në Marsejë po përdorin gjithnjë e më shumë të miturit për të zgjeruar aktivitetin e tyre, duke i joshur me premtime për fitime të shpejta dhe më pas duke i kthyer në shpërndarës droge, roje, rrëmbyes e madje vrasës me pagesë.

Dy djemtë, të cilët në atë kohë ishin vetëm 15 vjeç, kishin kontaktuar me një grup kriminal për të gjetur punë, megjithëse e dinin se bëhej fjalë për aktivitete të paligjshme. Njëri u ngarkua me administrimin e parave, ndërsa tjetri shiste drogë në lagjen Frais-Vallon.

Por shumë shpejt, drejtuesit e bandës i akuzuan se mungonin para nga të ardhurat e shitjeve. Kjo shënoi fillimin e një periudhe dhune: ata rriheshin rregullisht, detyroheshin të zhvisheshin dhe të kërcenin para kamerave për t'u shantazhuar. Njëri prej tyre u përdhunua.

Kur vendosën të arratiseshin, të dy tentuan të dilnin nga dritarja e katit të dytë. Gjatë përpjekjes u plagosën: njëri arriti të largohej, ndërsa tjetri u kap nga banda, u rrah dhe u godit me thikë, por mbijetoi.

Pas ndërhyrjes së policisë, në telefonin e njërit prej të dyshuarve për torturat u gjetën fotografi të të rinjve të tjerë në gjendje të ngjashme. Gjashtë burra janë dënuar me burgime të rënda për krimet ndaj dy adoleshentëve.

Pas kësaj historie qëndron DZ Mafia, një prej organizatave kriminale më të frikshme në Francë, e cila fitoi pushtet pas një lufte të përgjakshme për kontrollin e tregut të drogës në Marsejë.

Grupi ka ndryshuar mënyrën e funksionimit, duke përdorur rrjetet sociale për të krijuar imazhin e një marke kriminale. Sipas Dimitri Zoulas, drejtues i njësisë franceze kundër trafikut të drogës, DZ Mafia u bë veçanërisht e njohur në vitin 2023, kur nisi të publikonte deklarata dhe video në internet për të promovuar emrin dhe ndikimin e saj.

Organizata nuk kërkon më vetëm shpërndarës droge në rrugët e Marsejës. Ajo po zgjeron rekrutimin edhe në qytete të tjera të Francës, duke kërkuar të rinj që mund të përdoren për detyra shumë më të rënda, përfshirë rrëmbime, tortura dhe vrasje.

Një nga themeluesit e saj, Mehdi Laribi, me origjinë franko-algjeriane, u ndalua në Algjeri në fillim të këtij viti, në bazë të një urdhër-arresti francez.

Rekrutimi në Snapchat dhe Instagram, të rinjve u premtohen mijëra euro në muaj
Një nga mënyrat kryesore që përdorin bandat për të gjetur anëtarë të rinj është rekrutimi përmes rrjeteve sociale. Në platforma si Snapchat publikohen oferta për shoferë, korrierë dhe persona të gatshëm për të kryer atentate.

Njoftimet shoqërohen shpesh me imazhe të krijuara nga inteligjenca artificiale, ku jeta kriminale paraqitet si një mundësi për pasuri, makina luksoze dhe apartamente të shtrenjta.

Ofertat nuk kufizohen më te të rinjtë e lagjeve problematike të Marsejës, por arrijnë edhe në Paris, Nantes dhe Lille, duke tërhequr adoleshentë që nuk kanë pasur më parë lidhje me botën e krimit.

Një prej tyre është Camil, i cili i tregoi BBC-së se arriti të ngjitej në hierarkinë e DZ Mafia-s, deri në drejtimin e sigurisë në një prej zonave të kontrolluara nga banda.

Sipas tij, grupi di të identifikojë dëshirat dhe dobësitë e të rinjve. Disa joshen me makina të shtrenjta, të tjerë me para, apartamente, drogë apo prostituta. Por, pasi bëhen pjesë e organizatës, largimi është pothuajse i pamundur.

“Ndihesh besnik ndaj tyre për shkak të gjithçkaje që të japin. Qëndron deri në fund, derisa të përfundosh i vdekur ose në burg”, rrëfen Camil, duke shpjeguar se drejtuesit shfrytëzojnë dobësitë e rekrutëve dhe marrin kontrollin mbi jetën e tyre.

Një tjetër i ri, i identifikuar me pseudonimin Joe, punon për një bandë rivale të DZ Mafia-s. Ai tregon se fitonte rreth 3 mijë euro në muaj kur ishte vetëm 13 vjeç, ndërsa sot, në moshën 23-vjeçare, pretendon se të ardhurat nga aktiviteti kriminal arrijnë nga 5 mijë deri në 10 mijë euro në muaj.

I pyetur për pasojat e dhunës dhe viktimat e trafikut të drogës, ai pranon se ky aktivitet shkatërron jetë, por e justifikon duke thënë se secili bën zgjedhjet e veta.

Edhe Adam, një anëtar i DZ Mafia-s që ndodhet në burg dhe pret gjykimin për përfshirjen në disa çështje vrasjesh, tregon për BBC-në se u ngjit në hierarkinë e organizatës falë vendosmërisë dhe mungesës së hezitimit përballë dhunës.

Në një intervistë përmes Snapchat-it, ai pranon se vrasjet për të cilat akuzohet ishin tronditëse, por nuk shfaq pendesë të plotë, duke pretenduar se, edhe nëse nuk do t'i kishte kryer ai, dikush tjetër do të kishte bërë të njëjtën gjë.

Historia e Hugo-s, 15-vjeçari që u largua nga shtëpia dhe përfundoi i vrarë në Marsejë
Pasojat e kësaj bote kriminale nuk kufizohen vetëm te të rinjtë që përfshihen në trafik, por prekin edhe familjet e tyre.

BBC sjell historinë e Hugo Brouillard, i cili u largua nga shtëpia në veri të Francës kur ishte vetëm 15 vjeç, pas një konflikti me familjen. Policia e gjeti tre ditë më vonë në Marsejë, rreth 1 mijë kilometra larg banesës së tij, me para dhe kanabis. Ai u kthye te prindërit, por disa vite më vonë u largua sërish.

Në vitin 2023, Hugo u tha familjarëve se kishte gjetur një punë sezonale në një restorant pranë Marsejës. Për disa javë i telefononte prindërit dhe u tregonte se gjithçka po shkonte mirë.

Por vetëm tre javë më vonë, nëna e tij, Karine Brouillard, mori një telefonatë që i ndryshoi jetën. Një mjek e njoftoi se djali i saj ishte dërguar në spital me një plagë arme në kokë.

Policia dyshon se Hugo ishte përfshirë në aktivitetet e një prej bandave që kontrollojnë lagjet veriore të Marsejës. Restoranti ku ai pretendonte se punonte ekzistonte, por punonjësit i thanë nënës së tij se nuk kishin punësuar kurrë një person me atë emër.

Mbi 10 mijë të mitur të përfshirë në trafikun e drogës gjatë vitit 2025
Përmasat e fenomenit janë shqetësuese. Sipas shifrave zyrtare franceze të cituara në hetimin e BBC-së, gjatë vitit 2025 më shumë se 10 mijë fëmijë u përfshinë në një formë të aktivitetit të trafikut të drogës.

Ndërkohë, tregu i paligjshëm i narkotikëve po zgjerohet me shpejtësi. Numri i përdoruesve të kokainës në Francë pritet të arrijë në 2 milionë, nga rreth 600 mijë në vitin 2017.

Sipas Dimitri Zoulas, trafiku i drogës gjeneron rreth 7 miliardë euro në vit dhe përfshin afërsisht 200 mijë persona. Pasojat shkojnë përtej kriminalitetit, duke përfshirë rritjen e aksidenteve, dhunës në familje, depresionit, vetëvrasjeve dhe mbi 700 rasteve të mbidozës çdo vit.

“Jemi duke shkuar drejt një kolapsi të mundshëm sistemik të sistemit të drejtësisë penale”, paralajmëron Zoulas.

Rreth 1 mijë të arrestuar, por bandat vazhdojnë rekrutimin
Policia franceze ka ndërmarrë një sërë operacionesh kundër organizatave kriminale në Marsejë dhe qytete të tjera të vendit.

Që nga viti 2024, rreth 1 mijë persona të lidhur me DZ Mafia-n janë arrestuar dhe 600 prej tyre janë burgosur, sipas të dhënave të policisë. Megjithatë, arrestimet nuk kanë ndalur zgjerimin e organizatës, e cila vazhdon të rekrutojë të rinj për të zëvendësuar personat e arrestuar ose të vrarë.

Përgjegjësi i njësisë franceze kundër krimit të organizuar, Thibaut Fontaine, paralajmëron se bandat po shënjestrojnë gjithnjë e më shumë persona pa të kaluar kriminale, por që kanë probleme familjare apo dobësi të tjera që mund të shfrytëzohen. Këta të rinj konsiderohen më të lehtë për t'u manipuluar dhe për t'u futur në botën e krimit.

Për familjet, pasojat mund të jenë shkatërruese. Nëna e Hugo-s, Karine, ka një mesazh për drejtuesit e bandave që joshin fëmijët me premtime për para dhe jetë luksoze:

“Ata shkatërrojnë familje. Motra të vogla, vëllezër të vegjël, gjyshër. Por nuk besoj se këta njerëz kanë vërtet zemër”.

Historia e Marsejës tregon se pas makinave luksoze, parave të shpejta dhe reklamave në rrjetet sociale fshihet një realitet shumë më i errët: një industri kriminale që po përdor fëmijët për të zgjeruar pushtetin e saj, duke i kthyer ata njëkohësisht në viktima dhe autorë të dhunës.