Grabiti "Raiffeisen Bank" tek Komuna e Parisit, arrestohet 50-vjeçari, publikohet emri

Policia e Tiranës ka arrestuar personin e dyshuar për grabitjen e degës së “Raiffeisen Bank”, në zonën e "Komunës së Parisit", ngjarje e ndodhur më 2 nëntor.

Në pranga ka rënë Robert Duka, 50 vjeç, nga Vlora, i cili u arrestua pranë rrugës së "Kosovarëve" në Tiranë.

Sipas të dhënave paraprake, 50-vjeçari dyshohet se ka hyrë i armatosur në ambientet e bankës, ku ka kërcënuar punonjësit dhe më pas është larguar me një monopatinë elektrike. Shuma e grabitur ishte afro 60 mijë euro.

Hetimet kanë zbuluar gjithashtu dyshime se Duka mund të jetë i përfshirë edhe në një tjetër grabitje banke, të ndodhur disa muaj më parë, po në zonën e "Komunës së Parisit".

Kujtojmë se grabitja e degës së “Raiffeisen Bank” ndodhi rreth orës 10:45, ndërsa banka konfirmoi se nga ngjarja nuk pati persona të lënduar, mes punonjësve apo klientëve.