Shqiptari humb jetën tragjikisht në Itali, kush është punëtori që u aksidentua për vd'ekje në Leçe?

Një ngjarje e rëndë me pasojë vdekjen e një shtetasi shqiptar ka ndodhur në Itali, ku një 61-vjeçar ka humbur jetën gjatë kryerjes së punës. Ngjarja tragjike është regjistruar në lagjen “Spagnolo” të qytetit të Leçes.

Viktima është identifikuar si Bashkim Rushani, 61 vjeç, i cili ishte pronar i një kompanie ndërtimi. Sipas të dhënave të para nga vendngjarja, ai ka gjetur vdekjen e menjëhershme pasi është shtypur nga një portë metalike që është rrëzuar papritur mbi të.

Menjëherë pas njoftimit të ngjarjes, në vendin e incidentit kanë mbërritur me urgjencë ekipet e ndihmës mjekësore. Pavarësisht mbërritjes së shpejtë të mjekëve, plagët e marra kanë qenë të rënda dhe ata kanë mundur vetëm të konfirmojnë vdekjen e 61-vjeçarit.

Në vendngjarje kanë mbërritur edhe autoritetet vendore policore dhe inspektorët e punës, të cilët kanë nisur hetimet për zbardhjen e plotë të dinamikës së këtij aksidenti fatal.