“I dashur, ti je trap”/ Neda Balluku zbulon pse zgjodhi këtë titull për librin

Neda Balluku ka konfirmuar zyrtarisht se i ka dhënë fund martesës me bashkëshortin Ogren Balluku, pas 10 viteve bashkëjetesë. Lajmi u bë publik gjatë një interviste në emisionin “Goca & Gra”, ku moderatorja pranoi se çifti është divorcuar.

Megjithatë, pavarësisht turbulencave në jetën personale, Neda duket se ka zgjedhur të ecë përpara, duke mbetur aktive në rrjetet sociale dhe duke promovuar projektet e saj. Së fundmi, ajo është në fokus edhe për librin e saj më të ri me titullin provokues: “I dashur, ti je trap”, një titull që ka bërë shumë zhurmë për tonin e drejtpërdrejtë dhe ironik.

Një ndjekës e pyeti mbrëmjen e djeshme në Instagram se për kë e kishte fjalën me këtë titull. Neda u përgjigj shkurt, por me shumë kuptim:

“Është një lojë me lexuesin. Në shumë aspekte jam e bindur që është ajo që del trape. Jo ai.”
Me këtë deklaratë, ajo duket se e zhvendos vëmendjen nga sulmi ndaj partnerit mashkull, drejt një reflektimi më të thellë mbi përgjegjësitë, gabimet dhe mënyrën si i lexojmë marrëdhëniet. Titulli provokues është, siç thotë vetë, një ftesë për introspeksion jo thjesht një “shigjetë” ndaj ish-bashkëshortit.