Anita Haradinaj thumbon Oltën: “Nuk mund të jesh opinioniste e mirë nëse ke qenë banore”

E ftuar në rubrikën “Koment për koment”, Anita Haradinaj ndau përshtypjet e saj për eksperiencën personale si opinioniste në “Big Brother VIP Kosova”, ku u bë një prej zërave më të spikatur të programit për stilin e drejtpërdrejtë të komunikimit.

Ajo komentoi gjithashtu edhe edicionin e fundit të spektaklit, ku u zëvendësua nga aktorja Olta Gixhari, një ndryshim që ka ngjallur diskutime të shumta mes publikut dhe ndjekësve të formatit.

Ish-opinionistja u shpreh se që prej largimit të saj ka marrë reagime të shumta nga publiku që kërkojnë rikthimin e saj në panel, duke theksuar karakteristikat që sipas saj e bënin të veçantë.

“Unë kam marrë vazhdimisht komente që po u mungoj. Çiltërsia, mënyra e komunikimit të drejtpërdrejtë”.

Ajo shtoi se ka qenë e bindur që opinioni i publikut do të shprehej sapo u përzgjodhën emrat e rinj për këtë pozicion:

“Prej kur i kanë përzgjedhur opinionistët e rinj, e kam ditur që kanë për të më kërkuar”.

Duke folur konkretisht për Oltën, Anita tregoi se e ka vlerësuar si konkurrente në edicionin e “BBVA 2”, por ngriti dyshime mbi efektivitetin e saj si opinioniste, për shkak të angazhimit të mëparshëm si lojtare.

“E kam vlerësuar Oltën në BBVA si banore, por nuk mund të jesh opinioniste e mirë nëse ke qenë banore”.

Megjithëse nuk është aktualisht pjesë e emisionit, Anita la të hapur mundësinë për një rikthim, nëse i vjen një ftesë nga produksioni.

“Nëse më bëhet ftesa nga produksioni, nuk e përjashtoj rikthimin”.

Gjatë sezonit të parë të “BBVK”, Anita Haradinaj ishte një nga opinionistet më të komentuara, për qasjen e saj të drejtpërdrejtë, debatet e forta me banorët dhe ndikimin që kishte në diskutimet publike.