Rënia e çmimit të naftës në bursat ndërkombëtare, ekspertët parashikojnë reflektim të çmimeve edhe në Shqipëri
Lajmifundit
/
5 November 2026, 14:45
Aktualitet
Rënia e çmimit të naftës nën 100 dollarë për fuçi pritet të japë efekte pozitive në ekonominë globale dhe atë shqiptare, duke ndikuar në uljen e presioneve inflacioniste.
Megjithatë, sipas ekspertit të ekonomisë Artur Ribaj, zhvillimet në tregjet ndërkombëtare dhe rritja sezonale e konsumit gjatë dimrit mbeten faktorë që mund të ndikojnë në ecurinë e mëtejshme të çmimeve.
Në një intervistë për “Money Report”, Ribaj vlerëson se stabilizimi i çmimit të naftës dhe mungesa e përshkallëzimeve të mëtejshme të konfliktit me Iranin janë sinjale pozitive, ndërsa për Shqipërinë ndikim pritet të ketë edhe paketa fiskale.
Sa i përket politikës monetare, eksperti shprehet se në kushtet aktuale nuk shihet e nevojshme një rritje e mëtejshme e normës së interesit nga Banka e Shqipërisë.
“Tregjet bashkëveprojnë sipas mesazheve që marrin. Mesazhi që u dha nga zgjedhjet në Amerikë kishte të bënte me rritjen e çmimeve. Mund të ndodhë që të kemi përshkallëzime të mëtejshme, megjithatë ka pasur një efekt pozitiv që nuk janë ndërmarrë sulme të tjera ndaj Iranit. Ulja e çmimit të naftës ndihmon ekonominë globale.
Koha dhe stina e dimrit do të rrisin vetë konsumin e naftës dhe, për këtë shkak, do të ketë rritje të nevojës për konsum dhe, për pasojë, edhe rritje të inflacionit. Banka Qendrore e Ekonomisë është munduar që ta mbajë këtë normë të qëndrueshme. Çmimet e naftës do të ndikojnë në nivelet e inflacionit.
Jemi në situatat ku njerëzit po konsumojnë gjithnjë e më shumë. Rritja e normës së interesit nga Banka Qendrore të Ekonomisë nuk ka dhënë efektin e dëshiruar. Rënia e çmimit të naftës pritet që të ndikojë në Shqipëri. Për më tepër, do të jetë edhe paketa fiskale, e cila do të ulë çmimin e naftës në pompa, por do të shtojë taksën e automjetit. Jemi një ekonomi e hapur dhe shumë e lidhur dhe do të ketë efekt.
Do të ketë kohë për të mos ndryshuar në një të ardhme të afërt normën e interesit. Do të ishte mirë që të vazhdonte ende. Nuk mendoj që do të kemi nevojën për një politikë shtrënguese në këto momente”, tha eksperti i ekonomisë.