Reforma territoriale/ Komisioni i Ligjeve miraton hartën e re, 15 bashki shkrihen dhe 6 qytete shtohen

Politikë

 

Reforma territoriale/ Komisioni i Ligjeve miraton hartën e re, 15 bashki

Komisioni i Ligjeve miratoi në tërësi me 8 vota pro projektligjin për hartën e re territoriale, i cili tashmë i kalon seancës plenare. Reforma redukton numrin e bashkive nga 61 në 46, ndërsa gjatë shqyrtimit u miratuan edhe propozimet e socialistit Ermal Pacaj për t’u dhënë statusin e qytetit disa zonave të tjera.

Komisioni i Ligjeve ka miratuar në tërësi me 8 vota pro projektligjin për hartën e re territoriale, duke i hapur rrugë kalimit të tij për votim në seancën plenare të Kuvendit.

Harta e re ndryshon ndjeshëm organizimin aktual territorial të vendit, duke reduktuar numrin e bashkive nga 61 në 46. Në total janë 15 bashki që humbasin statusin aktual dhe bashkohen me bashki të tjera, ndërsa 28 bashki përfshihen në procesin e konsolidimit territorial.

Fushë-Arrëzi bashkohet me Pukën, Klosi me Matin dhe Rrogozhina me Kavajën. Berati zgjerohet duke marrë Dimalin dhe Poliçanin, ndërsa Elbasanit i bashkohen Cërriku dhe Belshi.

Patosi i bashkohet Fierit, Divjaka Lushnjës dhe Selenica Vlorës. Në juglindje, Maliqi bashkohet me Korçën, ndërsa Këlcyra me Përmetin. Memaliaj i bashkohet Tepelenës, Libohova Gjirokastrës dhe Përrenjasi Librazhdit.

Në këtë mënyrë, bashkitë Fushë-Arrëz, Klos, Rrogozhinë, Dimal, Poliçan, Patos, Divjakë, Selenicë, Maliq, Këlcyrë, Memaliaj, Libohovë, Cërrik, Belsh dhe Përrenjas nuk do të ekzistojnë më si bashki më vete nëse reforma merr votat e nevojshme edhe në seancën plenare.

Por ndryshimi nuk përfundon vetëm me reduktimin e numrit të bashkive. Harta e re sjell edhe një mënyrë të re organizimi të territorit, duke futur nivelin “qytet” mes bashkisë dhe njësisë administrative.

Gjatë shqyrtimit nen për nen në Komisionin e Ligjeve, deputeti socialist dhe relatori i projektligjit, Ermal Pacaj, propozoi që disa njësi të tjera të marrin statusin e qytetit. Propozimet, sipas tij, kanë ardhur gjatë procesit të konsultimit publik nga këshillat bashkiakë dhe lidhen edhe me kriteret që këto zona plotësojnë.

Në qarkun e Shkodrës, në Bashkinë Malësi e Madhe, Kastrati do të marrë statusin e qytetit dhe do t'i shtohet Koplikut. Kjo do të thotë se Malësia e Madhe do të ketë dy qytete: Koplikun dhe Kastratin.

Po në qarkun e Shkodrës, në Bashkinë Vau i Dejës, statusin e qytetit do ta marrë edhe Bushati. Bashkia do të organizohet kështu me qytetin e Vaut të Dejës dhe qytetin e Bushatit.

Ndryshime parashikohen edhe në qarkun e Dibrës. Në Bashkinë Mat, e cila me hartën e re përfshin edhe Klosin, propozohet që statusin e qytetit ta marrë edhe Ulza. Në këtë mënyrë, Mati do të ketë tre qytete: Burrelin, Klosin dhe Ulzën.

Në Bashkinë Bulqizë, Krasta do të marrë gjithashtu statusin e qytetit dhe do t'i shtohet Bulqizës.

Një tjetër ndryshim prek qarkun e Lezhës. Në Bashkinë Kurbin, Miloti do të marrë statusin e qytetit, duke e çuar në tre numrin e qyteteve brenda kësaj bashkie: Laç, Mamurras dhe Milot.

Gjatë diskutimit u bë edhe një korrigjim për Laçin. Pacaj sqaroi se në tabelën që shoqëronte projektligjin ishte bërë një lapsus, duke u përdorur emërtimi “qyteti Kurbin”. Formulimi korrigjohet dhe emërtimi i saktë do të jetë Bashkia Kurbin, me qytetet Laç, Mamurras dhe Milot.

Ndryshime do të ketë edhe në Bashkinë Kavajë, e cila zgjerohet me bashkimin e Rrogozhinës. Golemi do të marrë statusin e qytetit dhe bashkia e re do të përfshijë qytetet Kavajë, Rrogozhinë dhe Golem.

Për qarkun e Tiranës u propozuan gjithashtu korrigjime teknike të hartës. Në Bashkinë Vorë, kufiri ndarës me Bashkinë Tiranë, në zonën e njësisë administrative Bërxullë, do të përcaktohet nga autostrada Kashar-Thumanë në vend të përroit të Limuthit. Korrigjime teknike në hartë janë propozuar edhe për Bashkinë Kamëz.

Me ndryshimet e propozuara gjatë shqyrtimit në Komisionin e Ligjeve, harta e re nuk ndryshon vetëm kufijtë dhe numrin e bashkive, por riorganizon edhe mënyrën se si klasifikohen qendrat urbane brenda tyre.

Pas miratimit nen për nen dhe në tërësi në Komisionin e Ligjeve, beteja për hartën e re territoriale zhvendoset tashmë në seancën plenare. Për miratimin përfundimtar të reformës nevojiten 84 vota.

Nëse merr votat e nevojshme në Kuvend, Shqipëria do të kalojë nga 61 në 46 bashki, ndërsa 15 bashki të sotme do të humbasin statusin e tyre dhe do të bëhen pjesë e njësive më të mëdha vendore.

Si ndryshon harta e re territoriale

15 bashkitë që shkrihen dhe ku bashkohen:

• Fushë-Arrëz → bashkohet me Pukën
• Klos → bashkohet me Matin
• Rrogozhinë → bashkohet me Kavajën
• Dimal → bashkohet me Beratin
• Poliçan → bashkohet me Beratin
• Patos → bashkohet me Fierin
• Divjakë → bashkohet me Lushnjën
• Selenicë → bashkohet me Vlorën
• Maliq → bashkohet me Korçën
• Këlcyrë → bashkohet me Përmetin
• Memaliaj → bashkohet me Tepelenën
• Libohovë → bashkohet me Gjirokastrën
• Cërrik → bashkohet me Elbasanin
• Belsh → bashkohet me Elbasanin
• Përrenjas → bashkohet me Librazhdin

Zonat që marrin statusin e qytetit:

• Kastrati → qytet në Bashkinë Malësi e Madhe
• Bushati → qytet në Bashkinë Vau i Dejës
• Ulza → qytet në Bashkinë Mat
• Krasta → qytet në Bashkinë Bulqizë
• Miloti → qytet në Bashkinë Kurbin
• Golemi → qytet në Bashkinë Kavajë

ME TE LEXUARAT

NA SHKRUAJ

Portali Lajmifundit sjell Lajme nga Shqipëria, rajoni dhe bota në kohë rekord. Ju lutemi na kontaktoni nëse doni të kontribuoni me informacione të vlefshme për publikim në portalin tonë.

Kliko për më shumë informacion