Ndihmoi në zhdukjen e gjurmëve pas vra'sjes së Eglant Kocit? Gjykata merr vendimin për Enea Zyferin

Gjykata e Apelit ka vendosur të ndryshojë masën e sigurisë për Enea Zyferin, i cili është nën hetim për veprën penale të përkrahjes së autorit të krimit në lidhje me rrëmbimin dhe vrasjen e Eglant Kocit.
Nga masa “arrest në burg”, gjykata ka vendosur që Zyferi të kalojë në “arrest në shtëpi”. Në bazë të vendimit, ai do të qëndrojë në banesën e tij në Rajonin 2, në qytetin e Korçës, pa pasur të drejtë të largohet prej saj.
Sipas hetimeve të Prokurorisë, Enea Zyferi dyshohet se ka ndihmuar Armando Shakajn për të zhdukur gjurmët që lidhen me krimin, pas ngjarjes së rëndë. Për këtë arsye, ai akuzohet për përkrahje të autorit të krimit.
Ndërkohë, Armando Shakaj vijon të jetë në kërkim nga policia, pasi dyshohet si organizatori i rrëmbimit dhe vrasjes së Eglant Kocit.
Ndryshimi i masës së sigurisë për Zyferin është një zhvillim i ri në dosjen hetimore, ndërsa autoritetet vijojnë punën për zbardhjen e plotë të ngjarjes dhe dokumentimin e rolit të secilit prej personave të dyshuar.

