Sherret në Kuvend, PS kërkon përjashtimin e tre deputetëve demokratë

Partia Socialiste ka kërkuar zyrtarisht përjashtimin nga Kuvendi të tre deputetëve të opozitës, për shkak të sjelljes së tyre gjatë seancave plenare.

Bëhet fjalë për Flamur Noka, për të cilin është propozuar një masë disiplinore më e ashpër, me përjashtim për 60 ditë, si dhe për Albana Vokshi dhe Elda Hoti, për të cilat është kërkuar përjashtim për nga 30 ditë secila.

Sipas kërkesës së socialistëve, deputetët në fjalë kanë shkelur rregulloren e Kuvendit përmes veprimeve që kanë penguar zhvillimin normal të punimeve parlamentare, duke krijuar tensione dhe ndërprerje të vazhdueshme gjatë seancave.

Ky hap vjen në një klimë të ashpër politike mes mazhorancës dhe opozitës, ku përplasjet në sallën e Kuvendit janë bërë të shpeshta. PS argumenton se masat disiplinore janë të nevojshme për të garantuar rendin dhe funksionimin normal të institucionit.

Nga ana tjetër, pritet që deputetët e opozitës ta kundërshtojnë këtë vendim, duke e cilësuar si përpjekje për të kufizuar zërin e tyre në Parlament.

Kërkesa do të shqyrtohet nga organet përkatëse të Kuvendit, të cilat do të vendosin përfundimisht mbi masat disiplinore ndaj tre deputetëve.