Pamje tragjike në Zelandën e Re, 43 balena dalin në bregdet, nuk mbijeton asnjëra

Një ngjarje e rëndë është regjistruar në Zelandën e Re, ku 43 balena-pilot kanë ngordhur pasi kanë dalë në breg në një plazh pranë Ngawi, në zonën e Kepit Palliser, në pjesën më jugore të Ishullit të Veriut. 

Cetacet u zbuluan mëngjesin e së enjtes nga banorët e zonës dhe ekipet e shpëtimit. Fillimisht u raportua për 20 balena, katër prej të cilave rezultonin ende gjallë, por në një njoftim të mëvonshëm Ministria e Mbrojtjes së Mjedisit konfirmoi se asnjë prej tyre nuk arriti të mbijetonte.

Sipas organizatës “Project Jonah”, e specializuar në shpëtimin e balenave të bllokuara në brigje, shumë prej tyre kishin ngordhur që në momentin e zbulimit, ndërsa ato që ishin ende gjallë humbën jetën gjatë ditës.

Banorët vendas u përpoqën t’i mbanin balenat gjallë duke i freskuar dhe duke u krijuar kushte sa më të përshtatshme, ndërsa në operacion u angazhuan edhe autoritetet mjedisore dhe përfaqësues të komunitetit indigjen maori. Organizata e cilësoi ndërhyrjen si një përvojë të vështirë për të gjithë personat e përfshirë.

Autoritetet bëjnë me dije se brigjet jugore të Ishullit të Veriut janë të ekspozuara ndaj rrymave të forta dhe dallgëve të ngushticës së Kukut, ndërsa terreni shkëmbor e vështirësoi edhe më shumë ndërhyrjen e ekipeve të shpëtimit. Ndonëse balenat-pilot dalin herë pas here në brigjet e Zelandës së Re, 

Ministria e Mjedisit theksoi se një ngjarje e përmasave të tilla është tepër e pazakontë. Pas konfirmimit të ngordhjes së të 43 balenave, është vendosur që ato të varrosen me ndihmën e komunitetit vendas.