Ndryshoi fytyrën me operacione për t’i shpëtuar drejtësisë, arrestohet në Turqi i dënuari me 16 vite burg

Një burrë i dënuar me gati 16 vite burg është arrestuar në qytetin e Mersinit, në Turqi, pasi kishte tentuar t’i shpëtonte drejtësisë duke ndryshuar pamjen përmes ndërhyrjeve kirurgjikale estetike.
Sipas mediave turke, ndaj tij rëndonin 101 çështje të hapura për vjedhje dhe mashtrim. Për të mos u identifikuar nga policia, ai kishte kryer disa operacione plastike, ndërsa për t’u fshehur përdorte apartamente të marra me qira në emër të personave të tjerë.
Hetuesit që po ndiqnin gjurmët e tij kishin vënë nën vëzhgim edhe partneren e tij, një shtetase e huaj. Policia arriti të identifikonte adresën ku banonte gruaja, pavarësisht se ajo nuk ishte e regjistruar zyrtarisht aty.
Pas mbledhjes së informacioneve, efektivët organizuan një operacion në banesë, ku arrestuan të kërkuarin dhe partneren e tij. Kjo e fundit dyshohet se përballet me akuza për strehimin e një personi të kërkuar nga drejtësia.


