“Na lanë pa ujë e ushqim”/ Dëshmitë e ushtarëve rusë të braktisur në frontin e luftës

Shumë zyrtarë rusë – nga më i larti, presidenti Putin, deri te gjeneralët dhe ushtarët e thjeshtë – kishin krijuar bindjen, kur nisën pushtimin e Ukrainës në orët e para të 24 shkurtit 2022, se kjo ndërhyrje do të ishte… një shëtitje disa ditore, e cila do të përfundonte me dorëzimin pa kushte të Kievit.

Sot, rreth 4 vjet e gjysmë më vonë, kjo bindje është dëshmuar si një iluzion. Madje, realiteti është treguar shumë i ashpër jo vetëm për ukrainasit e goditur nga lufta, por edhe për vetë pushtuesit, të cilët kanë pësuar humbje të mëdha njerëzore. Sipas vlerësimeve të Qendrës për Studime Strategjike dhe Ndërkombëtare (CSIS), humbjet ruse arrijnë në rreth 1.5 milionë të vrarë, të plagosur dhe të zhdukur, ndërsa disa mijëra të tjerë janë kapur robër.

Sa u përket kushteve në radhët e trupave ruse, ato, sipas dëshmive të pretenduara të vetë ushtarëve, nuk i ngjajnë kushteve të jetesës njerëzore. Bazuar në dëshmitë e robërve të luftës të kapur nga forcat ukrainase, ushtarë rusë kanë mbetur për një kohë të gjatë pa ushqim, ujë dhe municione dhe, siç pretendojnë, janë detyruar madje të pinë urinën e tyre për të mbijetuar, pasi komandantët i kanë braktisur plotësisht.

Këto pretendime u bënë në një video të publikuar nga Korpusi i 3-të i Ushtrisë së Ukrainës, i cili kapi ushtarët rusë gjatë “Operacionit Vivaldi”, një kundërofensivë ukrainase në vazhdim kundër pozicioneve ruse në veri të qytetit Lyman, në rajonin e Donetskut.

Sipas Kievit, operacioni ka përmbysur brenda pak javësh një pjesë të konsiderueshme të fitimeve territoriale ruse të arritura pas muajsh operacionesh sulmuese dhe ka ndihmuar ukrainasit të rimarrin disa dhjetëra kilometra katrorë.

Pretendimet e robërve rusë, të bëra ndërsa ndodheshin nën mbajtje ushtarake, nuk janë verifikuar në mënyrë të pavarur nga media të mëdha ukrainase, si Kyiv Independent. Megjithatë, disa prej gjërave që ata përshkruajnë duket se konfirmohen pjesërisht nga blogerë ushtarakë rusë, të cilët në mënyrë të pavarur kanë raportuar për mungesa serioze të ujit, ushqimit, komunikimeve dhe furnizimeve në sektorin e Lymanit.

“Robëria është gjëja më e mirë që ju ka ndodhur”

Në videon e publikuar shfaqen rreth 50 robër rusë, të cilëve u flet komandanti i Korpusit të 3-të të Ushtrisë së Ukrainës, gjeneral brigade Andrii Biletskyi.

“Ju ka rënë llotaria”, u thotë Biletskyi, sipas përkthimit, duke shtuar se “robëria është gjëja më e mirë që mund t’ju kishte ndodhur”, duke pasur parasysh kushtet në të cilat ishin “detyruar” të luftonin.

Robërit pretenduan se kishin mbetur pa ushqim, ujë dhe kujdes mjekësor dhe se, në disa raste, ushtarët ishin detyruar të pinin urinën e tyre ose ujë nga pellgje me baltë dhe përrenj për të mbijetuar.

Njëri prej ushtarëve, i cili u prezantua si zëvendëskomandant i Kompanisë së 3-të të Sulmit të Regjimentit të 283-të të Divizionit të 144-të të Këmbësorisë së Motorizuar të Rusisë, në varësi të Armatës së 20-të të Kombinuar, pretendoi se “humbi më shumë se 60 kilogramë brenda gjashtë muajve”.

“Burrat vdisnin në pozicionet e tyre, sepse nuk mund t’u çonim dot as ushqim”, tha ai.

Sipas Biletskyit, një tjetër ushtar rus ishte në një gjendje kaq të avancuar urie, saqë vdiq pak pasi u kap nga forcat ukrainase.

Shumë prej robërve, të cilët gjithashtu deklarojnë se i përkasin Divizionit të 144-të të Këmbësorisë së Motorizuar, pretendojnë se komandantët e tyre i mashtronin për përmasat e ofensivës ukrainase.

“E 66-ta po vinte nga veriu”, thotë njëri prej ushtarëve. “Brigada e 3-të e Sulmit po na rrethonte nga jugu. Dhe komanda i shihte të gjitha këto shumë mirë, i dinte. Na gënjenin vazhdimisht.”

Një tjetër rob thotë:

“Oficerët tanë thjesht u larguan, fikën radion dhe na thanë: ‘Merrni pozicion mbrojtës rrethor dhe mbajini pozicionet’. Kaq. Pastaj radioja u mbyll.”

Blogerët ushtarakë rusë i konfirmojnë pjesërisht

Këto dëshmi kanë gjetur jehonë edhe në postime të fundit të blogerëve ushtarakë rusë.

“Këta njerëz qëndrojnë me ditë të tëra pa ujë. Shumë prej tyre tashmë kanë provuar urinën e tyre dhe nuk po e ekzagjeroj”, shkroi në Telegram një bloger ushtarak rus që përdor pseudonimin “Management Speaks”.

“A e dini sa burra janë kapur tashmë? Jo sepse u trembën, por sepse nuk ka komunikim, furnizime apo dronë që të paktën mund t’u hedhin ushqim dhe ujë në pozicionet e tyre”, shtoi ai.

Blogerët rusë pretendojnë gjithashtu se komandantët në terren i mashtronin si ushtarët e tyre, ashtu edhe eprorët në zinxhirin komandues, me pasojë që Shtabi i Përgjithshëm rus të mos e kuptonte në kohë përmasën e kundërofensivës ukrainase.

“Nga ky drejtim vazhdon të përhapet publikisht një valë informacioni të rremë, me synimin për të mashtruar vetë komandën dhe udhëheqjen e vendit, siç ka ndodhur tashmë në Sviatohirsk, Kupiansk dhe Borova”, shkroi një tjetër bloger rus, i njohur si “Military Informant”.

Komenti i tij lidhej me publikimin e një videoje që pretendohej se tregonte forcat ruse duke kontrolluar vendbanimin Novoye, në veri të Lymanit, i cili, sipas Korpusit të 3-të të Ushtrisë së Ukrainës, ishte rimarrë së fundmi nga ukrainasit.

Të ekspozuar udhëheqja ushtarake dhe politike e Rusisë

Raportimet e pasakta, sipas Kyiv Independent, kanë ekspozuar si udhëheqjen politike, ashtu edhe atë ushtarake të Rusisë.

Vladimir Putin kishte deklaruar më 1 shtator se Rusia kishte pushtuar Sviatohirskun. Megjithatë, më pak se një javë më vonë, Biletskyi publikoi një video në të cilën shfaqej duke lëvizur nëpër qytet dhe duke tallur deklaratat ruse.

“Dua t’i drejtohem udhëheqjes ushtarake dhe ushtarako-politike ruse. Nxirrni hundët e kllounëve dhe paruket shumëngjyrëshe që mbani. Mos u bëni qesharakë. Brigada e 60-të e Këmbësorisë së Motorizuar e Korpusit të 3-të të Ushtrisë ka kontroll të plotë mbi qytetin. Në fakt, ky është territori ynë i pasëm”, kishte deklaruar ai.

Ndërkohë, Korpusi i 3-të i Ushtrisë u kishte kërkuar hartografëve ukrainas dhe analistëve të burimeve të hapura që të vononin publikimin e hartave që tregonin përparimin ukrainas, në mënyrë që Shtabi i Përgjithshëm rus të mos e kuptonte në kohë përmasën reale të operacionit.

Kjo taktikë nuk kaloi pa u vënë re nga komentuesit rusë.

“Është interesante që Ukraina po zhvillon ofensivën e saj pranë Krasny Lymanit në heshtje të plotë: pa deklarata fitoreje dhe pa shfaqje”, shkroi në Telegram më 12 shtator Oleg Tsaryov – ish-deputet ukrainas që kaloi në anën ruse në vitin 2014 – në një periudhë kur informacionet për kundërofensivën ukrainase qarkullonin kryesisht si thashetheme në rrjetet sociale.

Korpusi i 3-të i Ushtrisë pretendon se gjatë “fazës së tretë” të kundërofensivës “Vivaldi”, humbjet ruse tejkaluan 2,000 persona, ndërsa më shumë se 250 ushtarë rusë u kapën robër.

Dhe ndonëse nuk ka konfirmim të pavarur për numrin e robërve, edhe burimet ruse kanë pranuar se një numër i konsiderueshëm ushtarësh janë kapur nga forcat ukrainase, ndërsa kanë kërkuar njëkohësisht përgjigje nga Kremlini.

“Njerëzit mund të përballojnë një dështim ushtarak”, shkroi Tsaryov. “Ka ardhur koha të thuhet e vërteta. Të pranohet se situata në atë zonë është ndryshe nga raportimi i fundit zyrtar. Të deklarohet se po shohim videot, po i studiojmë, po kontrollojmë numrin dhe emrat e robërve dhe kushtet në të cilat janë kapur. Nëse bëhet fjalë për një dështim real, ai duhet të pranohet dhe të shpjegohet.”