“Krenaria e një luftëtari për liri” - Thaçi rikthen MESAZHIN e arrestimit absurd pak orë para gjyqit të Hagës

”Jam krenar që kam qenë ushtar i Ushtrisë Çlirimtare të Kosovës që nga themelimi i saj. Ka qenë nderi më i madh në jetën time që ta barti uniformën e UÇK-së dhe të jem Drejtor Politik i saj. Ajo uniformë dhe shërbimi në luftën tonë çlirimtare nuk është hendikep, por nder, përparësi dhe krenari në çdo përballje me këdo”. Mesazhi i Hashim Thaçit vjen pak orë para procesit gjyqësor së ditës së nesërme.
Ish-Presidenti Hashim Thaçi ka ripostuar nga qelia e burgut mesazhin e publikuar në shkurt 2020, kur iu komunikua akuza absurde dhe u arrestua po atë vit disa muaj më vonë, për t’u gjykuar në Hagë. Hashim Thaçi, i dënuar politik sipas edhe shumë ekspertëve ndërkombëtarë të së drejtës, qëndron prej gjashtë vitesh i izoluar në Hagë.
Aktgjykimi ndaj ish-presidentit të Kosovës, Hashim Thaçi, dhe katër të akuzuarve të tjerë në rastin e administrimit të drejtësisë në Dhomat e Specializuara në Hagë, pritet të shpallet të martën, më 17 nëntor, nga ora 10:00. Vendimi cilidoqoftë ai nuk do të jetë vendimtar pasi do të apelohet.
Përveç Thaçit, në këtë proces gjyqësor të akuzuar janë ish-shefi i AKI-së, Bashkim Smakaj, ish-kryetari i Malishevës, Isni Kilaj, Fadil Fazliu dhe ish-ministri i Drejtësisë, Hajredin Kuçi.
Sipas aktakuzës së konfirmuar më 29 nëntor 2024, të pandehurit akuzohen për vepra penale që lidhen me pretendimet për përpjekje të paligjshme për të ndikuar në dëshmitë e dëshmitarëve në procesin gjyqësor për krime lufte.
Prokuroria pretendon se, nga 12 prilli deri më 2 nëntor 2023, Thaçi u kishte përcjellë të akuzuarve informacione konfidenciale për dëshmitarët dhe udhëzime për të ndikuar në dëshmitë e tyre. Për këtë rast, Prokuroria ka kërkuar dënimin e Thaçit me gjashtë vjet burgim, duke kërkuar që koha e kaluar në paraburgim të mos i llogaritet në dënimin e mundshëm.
Sakaq, më 16 shtator 2026, në një gjyq të veçantë, e njëjta gjykatë e dënoi Thaçin me 25 vjet burg në mesin e shtatorit, duke e shpallur fajtor për krime lufte në Kosovë dhe Shqipëri në vitet 1998-99.
E ndërsa nga njëra anë vazhdon gjyqi absurd ndaj udhëheqësve të luftës për liri, shumë nga përgjegjësit e krimeve të rënda ndaj popullatës civile e të pambrojtur nuk u hetuan kurrë, ndonëse humbën jetën dhe u zhdukën mbi 13 mijë civilë shqiptarë, shumica gra e fëmijë.


