Itali/ 35-vjeçari shqiptar kafshon ëmbëlsirën pa e vënë re grerëzën, pickohet në gojë dhe përfundon në spital

Një 35-vjeçar shqiptar ka përjetuar momente të frikshme në Itali, pasi u pickua nga një grerëz në brendësi të gojës, teksa po hante mëngjes në një lokal pranë portit.
I riu ishte ndalur në bar për të konsumuar një ëmbëlsirë me krem pastiçerie, por pa e vënë re, mbi të ishte vendosur një grerëz. Në momentin që kafshoi ëmbëlsirën, insekti e pickoi brenda zgavrës së gojës, duke i shkaktuar dhimbje të forta.
I surprizuar nga ajo që po ndodhte, 35-vjeçari kërkoi menjëherë ndihmë, pasi dhimbja ishte e menjëhershme dhe e fortë.
Në vendngjarje ndërhynë me shpejtësi efektivët e Kryqit të Verdhë, së bashku me një autoambulancë të pajisur me mjek.
Pas marrjes së ndihmës së parë, shqiptari u transportua në spitalin e Torrette-s. Në spital, mjekët i administruan medikamente për të parandaluar një reaksion të rëndë alergjik dhe shfaqjen e shokut anafilaktik, një komplikacion që mund të rrezikojë seriozisht jetën e tij.


