Goditje e dyfishtë e Policisë së Tiranës, arrestohen autorët e grabitjeve të bankave dhe shtetasi grek për dro'gë në Rinas

Policia e Tiranës ka zbardhur dy vjedhjet me armë të kryera në dy filiale bankare në kryeqytet, ndërsa ka goditur edhe një rast të trafikimit të lëndëve narkotike përmes Aeroportit të Rinasit.

Në kuadër të operacionit të koduar “Gjuetari i Bankave”, është identifikuar dhe ndaluar shtetasi Robert Duka alias A. Duka, 50 vjeç, i dyshuar si autor i dy grabitjeve nën kërcënimin e armës së zjarrit, të ndodhura më 2 qershor 2026 dhe 2 nëntor 2026, në dy filiale bankare në Tiranë.

Sipas Policisë, identifikimi i tij u bë i mundur falë hetimeve të thelluara, përdorimit të sistemeve teknologjike për identifikimin e personave pavarësisht maskimit, si dhe analizimit të veshjeve të përdorura gjatë kryerjes së vjedhjeve.

Gjatë kontrolleve, policia sekuestroi 8 200 euro, veshje që dyshohet se janë përdorur gjatë grabitjeve dhe dy aparate celularë. Hetimet vijojnë për dokumentimin e plotë të ngjarjeve.

Ndërkohë, në kuadër të operacionit “Fly”, është arrestuar një shtetas grek, 51 vjeç, i identifikuar me inicialet M. P., i dyshuar për trafikimin e lëndëve narkotike përmes Aeroportit të Rinasit.

Gjatë kontrollit të bagazheve të pasagjerëve të linjës Athinë–Rinas, në një valixhe u gjetën dy paketime me material bimor, të dyshuar si Cannabis sativa.

Pas hetimeve, policia identifikoi poseduesin e dyshuar të valixhes, i cili ishte larguar nga aeroporti menjëherë pas mbërritjes. Ai u lokalizua dhe u arrestua në flagrancë në rrugën e Durrësit, nën akuzën e trafikimit të narkotikëve. Lënda e dyshuar narkotike u sekuestrua në cilësinë e provës materiale.

Njoftimi: 

Përshëndetje!
 
Sot jemi këtu për t’ju informuar mbi rezultatet e punës hetimore të Policisë së Tiranës, për zbardhjen e dy vjedhjeve me armë në dy filiale bankare, si dhe goditjen e një rasti të trafikimit të lëndëve narkotike nëpërmjet Aeroportit të Rinasit.
 
Pavarësisht angazhimit intensiv të strukturave të Policisë gjatë protestave, për garantimin e rendit dhe sigurisë publike, puna hetimore për zbardhjen e ngjarjeve kriminale ka vijuar pa ndërprerje.
Si rezultat i hetimeve të thelluara, të kryera me metoda speciale, nga strukturat hetimore, nën drejtimin e Prokurorisë, u finalizua operacioni policor i koduar “Gjuetari i Bankave”.
 
Në kuadër të këtij operacioni u identifikua dhe u ndalua shtetasi R. D., alias A. D., 50 vjeç, i dyshuar si autor i dy vjedhjeve nën kërcënimin e armës së zjarrit, të kryera më datë 02.06.2026 dhe 02.11.2026, në dy filiale bankare në Tiranë.
Identifikimi i tij u arrit falë punës profesionale hetimore, përdorimit të sistemeve teknologjike për identifikimin e personave pavarësisht maskimit, si dhe analizimit të veshjeve të përdorura gjatë vjedhjeve.
 
Gjatë kontrolleve u sekuestruan ;
- 8 200 euro,
- Veshje të përdorura gjatë kryerjes së veprave penale
- 2 aparate celularë.
Hetimet vijojnë për dokumentimin e plotë të këtyre ngjarjeve.
 
Ndërkohë, në kuadër të operacionit policor të koduar “Fly”, specialistët për Hetimin e Narkotikëve në bashkëpunim me Komisariatin e Policisë Rinas dhe autoritetet doganore, bazuar në informacionet e siguruara ushtruan kontroll në bagazhet e pasagjerëve të linjës ajrore Athinë–Rinas.
 
Gjatë kontrollit, në një valixhe u gjetën dy paketime me material bimor, të dyshuar si lëndë narkotike Cannabis sativa.
 
Pas veprimeve intensive hetimore u identifikua poseduesi i dyshuar i valixhes, shtetasi grek M. P., 51 vjeç, i cili ishte larguar nga aeroporti menjëherë pas mbërritjes.
 
 
Shërbimet e Policisë bënë të mundur lokalizimin dhe kapjen e tij në rrugën e Durrësit, ku u arrestua në flagrancë për veprën penale “Trafikimi i narkotikëve”.
Lënda e dyshuar narkotike u sekuestrua në cilësinë e provës materiale.
 
Gjithashtu, dje, nga Strukturat hetimore, u kapën dhe u ndaluan 3 shtetas me masë sigurie “Arrest me burg” konkretisht;
- O.K. 29 vjeç
- G.S. 28 vjeç
- S.H. 20 vjeç
 
Të nderuar qytetarë!
 
Policia e Tiranës mbetet maksimalisht e angazhuar për garantimin e rendit dhe sigurisë publike, parandalimin dhe goditjen e kriminalitetit, si dhe vënien përpara përgjegjësisë ligjore të autorëve të veprave penale.
 
Faleminderit