Është pjesë e ushtrisë, plagoset rëndë djali i ambasadorit izraelit në SHBA

Neria Leiter, djali i ambasadorit izraelit në Shtetet e Bashkuara, Yechiel Leiter, është plagosur rëndë pasditen e së mërkurës në një sulm me automjet në Bregun Perëndimor.

Sipas CNN, që citon autoritetet lokale, ngjarja ndodhi pranë një pike kontrolli afër vendbanimit Beit Horon, ku Leiter, i cili shërben si ushtar rezervist, ishte në detyrë.

Ai u transportua me urgjencë në një spital në Jerusalem për të marrë trajtim mjekësor.

Drejtuesi i automjetit, 29-vjeçari Mahmoud Muhammad Mahmoud Suleiman, palestinez nga fshati i afërt Beit Ur al-Tahta, u qëllua për vdekje në vendngjarje.

Ngjarja ndodhi një ditë para fjalimit të kryeministrit izraelit Benjamin Netanyahu në Asamblenë e Përgjithshme të Kombeve të Bashkuara.

Familja Leiter është prekur edhe më parë nga lufta. Djali i madh i ambasadorit, Moshe Yedidya Leiter, 39 vjeç, u vra në luftime në Gaza në nëntor 2023, gjatë javëve të para të luftës.