E trishtë, ndahet nga jeta pedagogu dhe studiuesi i njohur shqiptar prej më shumë se 50 vitesh

Aktualitet

E trishtë, ndahet nga jeta pedagogu dhe studiuesi i njohur shqiptar prej
Është ndarë dje nga jeta Prof. Dr. Agron Lufi (1947–2026), arkitekt, pedagog dhe studiues i njohur, i cili për më shumë se pesë dekada kontribuoi në arsimin, kërkimin shkencor dhe zhvillimin e arkitekturës e urbanistikës në Shqipëri.

Fakulteti i Arkitekturës dhe Urbanistikës dhe Universiteti Politeknik i Tiranës shprehën dhimbjen për humbjen e Prof. Lufit, duke vlerësuar kontributin e tij në formimin e brezave të arkitektëve dhe urbanistëve shqiptarë dhe në zhvillimin e mendimit bashkëkohor arkitekturor në vend.

Prof. Lufi u diplomua inxhinier ndërtimi në Universitetin Politeknik të Tiranës në vitin 1969 dhe e nisi karrierën akademike si asistent pedagog në Katedrën e Arkitekturës dhe Urbanistikës. Gjatë karrierës së tij fitoi titujt kandidat i Shkencave në Arkitekturë, Doktor i Shkencave, Profesor i Asociuar dhe Profesor.

Ai drejtoi Fakultetin e Inxhinierisë së Ndërtimit gjatë viteve 1992–1997 dhe Departamentin e Arkitekturës dhe Urbanistikës në periudhën 2003–2008, ndërsa ishte gjithashtu përgjegjës i Qendrës së Kërkimit Shkencor pranë Fakultetit të Arkitekturës dhe Urbanistikës.

Veprimtaria e tij shkencore u përqendrua në tipologjitë e arkitekturës shqiptare, ndërtesat arsimore dhe publike, teknologjinë e ndërtimit dhe mbrojtjen e trashëgimisë arkitekturore.

Ai ishte autor e bashkautor i botimeve dhe artikujve shkencorë dhe udhëhoqi shumë tema doktorature dhe diplomash.

Prof. Lufi u formua dhe u kualifikua edhe në institucione prestigjioze ndërkombëtare, përfshirë Architectural Association School of Architecture dhe The Bartlett School of Architecture në Londër, si dhe fakultetet e arkitekturës në Firence, Torino dhe Romë.
 E trishtë, ndahet nga jeta pedagogu dhe studiuesi i njohur shqiptar prej
Ai kontribuoi në modernizimin e arsimit arkitekturor në Shqipëri, duke promovuar edhe konceptet e projektimit bioklimatik, qëndrueshmërisë dhe eficiencës energjetike.

Në fushën profesionale, ai kontribuoi në një sërë studimesh dhe projektesh të rëndësishme urbanistike, mes tyre Plani Rregullues i Zonës Industriale të Tiranës, Studimi Rajonal dhe Mjedisor Farkë–Sauk, Studimi Urbanistik dhe Turistik i Bregut të Liqenit të Shkodrës dhe Plani Rregullues i Qytetit të Tiranës i vitit 2012, si bashkautor.

Studentë, kolegë dhe bashkëpunëtorë do ta kujtojnë për kontributin e tij në arsimin arkitekturor, profesionalizmin dhe përkushtimin ndaj zhvillimit të arkitekturës dhe urbanistikës shqiptare.

Homazhet në nderim të Prof. Dr. Agron Lufit do të mbahen sot më 6 tetor 2026, nga ora 09:00 deri në 12:00, pranë Akademisë së Shkencave. Më pas kortezhi do të niset drejt Varrezave të Tufinës.

 


 

ME TE LEXUARAT

NA SHKRUAJ

Portali Lajmifundit sjell Lajme nga Shqipëria, rajoni dhe bota në kohë rekord. Ju lutemi na kontaktoni nëse doni të kontribuoni me informacione të vlefshme për publikim në portalin tonë.

Kliko për më shumë informacion