Grabitja e tetë bizhuterive me vlerë 88 mln euro në Muzeun e Luvrit, arrestohen 5 persona, dyshohet se ...

Pesë persona janë arrestuar mbrëmjen e djeshme rreth orës 8 në arondissementin e 16-të të Parisit, në kuadër të një hetimi për vjedhjen spektakolare që ndodhi në Muzeun e Luvrit 11 ditë më parë. Sipas Le Figaro-s, të pestë të arrestuarit janë aktualisht në paraburgim, përfshirë një nga të dyshuarit kryesorë në këtë grabitje.

Një burim policor tha se njëri nga të dyshuarit, një shtetas algjerian 34-vjeçar, ishte arrestuar më 25 tetor në aeroportin Roissy-Charles de Gaulle, pak para se të nisej për në Algjeri pa një biletë vajtje-ardhje. Një tjetër i dyshuar, një burrë 39-vjeçar, u kap pak më vonë, pranë shtëpisë së tij në Aubervilliers, një periferi e Parisit.

Më 19 tetor, hajdutët përdorën një ashensor lëvizës për t'u ngjitur në Muze dhe thyen dritaren që të çonte në Galerinë Apollo, vitrinën e muzeut për Xhevahiret e Kurorës Franceze, dhe vodhën thesare mbretërore që u përkisnin disa sovranëve francezë, përfshirë Perandoreshën Eugenie, gruan e Napoleonit III.

Grabitësit arritën që të merrnin 8 bizhuteri, stolitë e Mbretëreshës Marie-Amélie, varëset dhe vathët e Marie-Louise, me një humbje të vlerësuar prej 88 milionë eurosh.