Terrorizëm dhe komplot kundër pavarësisë së vendit, arrestohen dy politikanët

Policia në Nikaragua ka arrestuar dy sfidues të tjerë presidencialë të liderit veteran Daniel Ortega në zgjedhjet më vonë këtë vit. Bëhet fjalë për Felix Maradiaga dhe Juan Sebastián Chamorro, të akuzuar për terrorizëm dhe komplot ndaj sovranitetit dhe pavarësisë së Nikaragua-s.

Ndërkohë një javë më parë, udhëheqësja e opozitës Cristiana Chamorro u vendos në arrest shtëpiak për pretendimin e pastrimit të parave, gjë që ajo e mohon. Dhe të shtunën një figurë tjetër e opozitës, Arturo Cruz, u arrestua në aeroportin e Managua ndërsa mbërriti nga SHBA-të.

Presidenti Ortega, 75 vjeç, po kërkon një mandat të katërt radhazi në zgjedhjet e nëntorit. Të martën, Maradiaga, 44 vjeç, u thirr në zyrën e prokurorit publik në Managua dhe pasi u mor në pyetje ai u largua nga ndërtesa, duke thënë: “Unë do të qëndroj në garë për kandidaturën presidenciale”.

Sipas raporteve, policia më pas e ndaloi atë dhe avokatin e tij në makinën e tyre. Një zëdhënës i opozitës tha se Maradiaga ishte rrahur nga policia gjatë arrestimit dhe se vendndodhja e tij nuk dihej. Pak më vonë, Juan Sebastián Chamorro, një kushëri i Cristiana Chamorro – u arrestua në shtëpinë e tij jashtë Managuas.

Deklarata të veçanta të policisë thanë se arrestimet u kryen për të njëjtat arsye – për “kryerjen e akteve që minojnë pavarësinë, sovranitetin dhe vetëvendosjen, nxitjen e ndërhyrjeve të huaja në punët e brendshme dhe thirrjen e ndërhyrjeve ushtarake”. Burrat akuzohen gjithashtu për përdorimin e “financimit nga fuqitë e huaja për të kryer akte terrorizmi dhe destabilizimi”./BW