Bilanc i rëndë nga fruthi, sëmundja merr mbi 1 mijë jetë fëmijësh në Bangladesh

Të paktën 1,140 fëmijë kanë humbur jetën në Bangladesh që prej marsit, kur vendi u përfshi nga një epidemi e fruthit. Bilanci është rënduar pas vdekjes së gjashtë fëmijëve të tjerë gjatë 24 orëve të fundit, bëjnë të ditur autoritetet shëndetësore lokale, të cituara nga agjencia e lajmeve UNB.

Sipas të dhënave zyrtare të Drejtorisë së Përgjithshme të Shërbimeve Shëndetësore të Bangladeshit (DGHS), deri tani janë regjistruar të paktën 222,313 raste të fëmijëve me fruth ose me simptoma që lidhen me sëmundjen.

Epidemia ka prekur veçanërisht fëmijët, ndërsa autoritetet shëndetësore po përballen me një situatë të rënduar për shkak të përhapjes së sëmundjes.

Fruthi, rrezik veçanërisht për fëmijët e pavaksinuar

Sipas statistikave të fundit të Organizatës Botërore të Shëndetësisë (OBSH), deri në 95,000 persona mund të vdesin çdo vit në mbarë botën nga fruthi, kryesisht fëmijë nën moshën pesë vjeç që nuk janë vaksinuar ose që kanë marrë vetëm një pjesë të vaksinave të rekomanduara.

Fruthi është një sëmundje shumë ngjitëse, por vaksinimi konsiderohet masa kryesore për parandalimin e rasteve të rënda dhe të vdekjeve.