U kapën me një shumë lekësh dhe fleta votimi në makinë, arrestohen dy të rinjtë në Maqellarë!

Denis Xholi, drejtori juridik i Bashkisë Bulqizë dhe Adnan Xholi, i afërm i tij, janë arrestuar nga policia një ditë më parë, për veprat penale “Korrupsioni aktiv në zgjedhje” kryer në bashkëpunim dhe “Përdorimi i funksionit publik për veprimtari politike ose zgjedhore”.

Këto dy shtetas rreth orës 14 të një dite më parë në segmentin rrugor Maqellarë-Peshkopi, në automjetin me të cilin udhëtonin, policia sekuestroi një shumë lekësh, modele për të orientuar zgjedhësit për mënyrën e votimit si dhe fletëpalosje të një subjekti politik.

Po ashtu policia ka filluar procedimin penal në gjendje të lirë për veprën penale “Pengimi i qarkullimit të mjeteve të transportit automobilistik”, për shtetasit A. S. dhe G. H., banues në Dibër, pasi u kanë bllokuar rrugën dy shtetasve të arrestuar, në afërsi të rrethrrotullimit të Maqellarës, duke bllokuar rrugën Peshkopi - Maqellarë.

Materialet procedurale në ngarkim të shtetasve të lartpërmendur iu referuan Prokurorisë Pranë Gjykatës së Shkallës së Parë Dibër për veprime të mëtejshme.