"Rrugorja" me dorë të hekurt, gjoba deri në 400 mijë lekë dhe pezullim të patentës

Gjoba të majme dhe pezullim patente për disa drejtues mjetesh që janë konstatuar nga Policia e Shtetit në aksin Sauk-Teg, duke lëvizur në kundërshtim me rregullat e qarkullimit rrugor.

Policia Rrugore e Tiranës thotë se ka ushtruar kontrolle me radar prej orës 20:00 të mbrëmjes së djeshme e deri në orën 00:30 të mëngjesit të sotëm.

Janë evidentuar 23 drejtues mjetesh që qarkullonin me shpejtësi nga 141km/h deri në 183 km/h, të cilëve iu pezullua leja e drejtimit nga 4 muaj deri në 18 muaj dhe u ndëshkuan me masë administrative nga 10.000 deri në 25.000 lekë të rinj secilit.

Gjithashtu janë ndëshkuar 4 drejtues automjetesh me nga 40.000 mijë lekë të rinj për gara shpejtësie.

Kontrolle janë ushtruar edhe në të gjitha rrugët e Tiranës me drager për të parandaluar ngjarjet rrugore që vijnë si pasojë e drejtimit të mjeteve nën efektin e alkoolit.

“Si rezultat janë pezulluar 9 leje drejtimi për drejtim mjeti nën efektin e alkoolit.
Janë arrestuar 2 drejtues mjetesh për drejtim mjeti në gjendje të dehur dhe 3 për drejtim mjeti pa leje drejtimi”, bën me dije policia Rrugore.