Grabitën kompjuterët e shkollës, bie në prangat e policisë 19-vjeçari, procedohen dy nxënës

Policia ka finalizuar operacionin e koduar “Mjetet” për zbardhjen e vjedhjes së disa pajisjeve elektronike nga një shkollë në Babrru, ndodhur pesë ditë më parë.

Si rezultat, u arrestua njëri prej autorëve, shtetasi E. N., 19 vjeç, ndërsa dy bashkëpunëtorë, të moshave 14 dhe 17 vjeç, nxënës të shkollës, u proceduan në gjendje të lirë për shkak të moshës.

Policia sekuestroi pajisjet e vjedhura, përfshirë kompjuterë, laptopë, monitorë dhe pajisje të tjera, të cilat ishin fshehur nga autorët.

Materialet procedurale u referuan Prokurorisë për veprime të mëtejshme.

Njoftimi i policisë:

Finalizohet operacioni policor i koduar “Mjetet”, për zbardhjen e vjedhjes së disa pajisjeve elektronike, në një shkollë në Babrru, kryer 5 ditë më parë.

Identifikohet dhe arrestohet njëri nga autorët e rastit.

Procedohen në gjendje të lirë, për shkak të moshës, 2 bashkëpunëtorët e tij, nxënës të kësaj shkolle.

Gjenden dhe sekuestrohen pajisjet e vjedhura.

Menjëherë pas njoftimit se më datë 10.01.2025, gjatë natës, ishte thyer dera e një shkolle në Babrru dhe ishin vjedhur aty, disa pajisje elektronike, Komisariati i Policisë Nr. 5 ka organizuar punën me qëllim zbardhjen e autorësisë dhe rrethanave të rastit.

Si rezultat i veprimeve të shpejta dhe profesionale hetimore, të kryera në kuadër të operacionit “Mjetet”, u identifikuan autorët e dyshuar të rastit. Njëri prej tyre, shtetasi E. N., 19 vjeç, u kap dhe vu në pranga, ndërsa për 2 bashkëpunëtorët e tij, të moshave 14 dhe 17 vjeç (nxënës të kësaj shkolle), filloi procedimi në gjendje të lirë.

Pajisjet e vjedhura, konkretisht: 3 kompjuterë, 1 laptop, 5 tastiera kompjuteri, 3 monitorë, 1 celular dhe 2 bokse, u gjetën të fshehura nga këta 3 shtetas dhe u sekuestruan nga Policia, me cilësinë e provës materiale.