Emrat/ U mbajt peng nga katër persona në Gjirokastër, 34-vjeçari ishte shpërndarës droge

Të tjera detaje kanë dalë në lidhje me pengmarrjen në Gjirokastër, ku tre persona u vunë në pranga.

Burime për “Panorama.al” bëjnë të ditur se 34-vjeçari që u mor peng për disa orë njihet si përdorues dhe shpërndares i lëndëve narkotike.

Po ashtu bëhet e ditur se i riu u mbajt peng nën kërcënimin e armës në shtëpinë e 35-vjeçares.

Për ngjarjen në pranga u vunë tre persona, Myrteza Domi, Denisa Karagjozi dhe  Enea Taho. Ndërsa një 14-vjeçar u procedua në gjendje të lirë.

Njoftimi

Specialistët e Seksionit për Hetimin e Trafiqeve të Paligjshme dhe Narkotikëve në DVP Gjirokastër në bashkëpunim me Komisariatin e Policisë Gjirokastër, në bazë të informacioneve të siguruara në rrugë operative se shtetasit J. Gj., 34 vjeç, banues në Gjirokastër, i kanë hequr lirinë nën kërcënimin e armës 4 shtetas, organizuan punën dhe  falë veprimeve  të shpejta dhe profesionale bënë të mundur finalizimin e operacionit “Kalaja”, ku si rezultat u arrestuan në flagrancë shtetasit: M. D., 28 vjeç, E. T., 33 vjeç dhe D. K., 35 vjeçe, të tre banues në Gjirokastër, si dhe u procedua në gjendje të lirë  një 14 vjeçar.

Shtetasit e mësipërm në bashkëpunim me njëri – tjetrin nën kërcënimin e armës  i kanë hequr lirinë shtetasit J. Gj, duke ushtruar dhunë fizike dhe psikologjike ndaj tij për disa orë.

Falë reagimit të menjëherëshëm të Policisië dhe veprimeve të shpejta profesionale dhe hetimore  u bë e mundur zbardhja e ngjarjes, identifikimi, lokalizimi dhe vënia në pranga e autorëve të dyshuar të kësaj ngjarjeje.

Nga kontrolli i ushtruar në banesën e shtetasit E. T., u gjetën dhe u sekuestruan në cilësinë e provës materiale 1 armë zjarri automatike, 35 doza me lëndë të dyshuar narkotike Cannabis Sattiva, një mjet mprehës (thikë).

Materialet i kaluan Prokurorisë Pranë Gjykatës së Shkallës së Parë Gjirokastër për veprime të mëtejshme.