Avokati i nënës lehonë tregon "të fshehtat" e arrestimit: Dianën e denoncoi ish-vjehrri

Anton Kosteri, avokati që është marrë me çështjen e Diana Bahçjas tha në një intervistë për “Review” në Euronews Albania se 25-vjeçarja u denoncua nga ish-vjehrri.

E reja e cila u arrestua duke lënë foshnjën 8-ditëshe në shtëpi, tashmë është liruar nga burgu.

Gjykata e shkallës së parë në Tiranë i ka vendosur një gjobë në vitin 2020 prej 2 milionë e 500 mijë lekë të vjetër, duke ia konvertuar në 50 ditë burg. Arsyeja e gjobës është braktisja e fëmijës që Diana ka nga martesa e parë.

“Ne kemi arritur të gjejmë vetëm 2 vendime të gjykatës. Vendimin e vitit 2020 që e ka dënuar me gjobë fillimisht për veprën penale të braktisjes së fëmijës së mitur dhe më pas vendimin e konvertimit.

Ajo është denoncuar në datën 9 qershor të vitit 2017 në komisariatin e policisë Mat. Aty ka filluar procesi, e ka denoncuar konkretisht, ish-vjehrri i cili ka pretenduar që Diana është larguar nga banesa në mënyrë të papritur dhe ka lënë fëmijën e mitur 8 muajsh.

Të njëjtin qëndrim ka mbajtur dhe ish-vjehrra e më pas është konfirmuar dhe nga ish-bashkëshorti, që në fakt në momentin kur pretendohet se Diana është larguar nga banesa, ai nuk ka qenë në Shqipëri, por në emigrim në Greqi për arsye ekonomike,” – u shpreh avokati.