3 mijë merimanga të fshehura në çorape, synohej dërgimi në Gjermani nëpërmjet aeroportit

Një zbulim i pazakontë është bërë në aeroportin ndërkombëtar të Limës, në Peru, ku autoritetet kanë zbuluar më shumë se 3 mijë tarantula të fshehura në valixhet e tre pasagjerëve që po përgatiteshin të udhëtonin drejt Gjermanisë.

Merimangat helmuese ishin vendosur brenda çorapeve të përdorura, në një përpjekje për t’i transportuar ilegalisht në Evropë dhe për t’i shitur në tregun e kafshëve ekzotike.

Zbulimi u bë gjatë kontrolleve të zakonshme të autoriteteve peruane, pasi punonjësit vunë re diçka të pazakontë në bagazhet e udhëtarëve. Disa prej sendeve të vendosura brenda valixheve dukeshin sikur po lëviznin, duke ngritur dyshimet e punonjësve.

“Ndërsa po kontrollonim me dorë, vumë re se disa çorape po lëviznin”, deklaroi Cora Suarez, teknike e shërbimit përgjegjës për kontrollin.

Sipas Shërbimit Peruan të Pylltarisë dhe Jetës së Egër (SERFOR), tarantulat ishin fshehur në çorape të përdorura, me qëllim shmangien e kontrolleve në aeroport. Mes tyre kishte ekzemplarë të moshave dhe madhësive të ndryshme, duke nisur nga merimanga shumë të vogla, të sapoçelura nga vezët, deri te ekzemplarë të rritur.

Ekspertët kanë konstatuar se merimangat vinin nga rajone të ndryshme të Perusë. Ky detaj ka ngritur dyshimet se nuk bëhej fjalë për një rast të izoluar, por për një aktivitet të organizuar të trafikimit të kafshëve të egra.

Tre personat që po transportonin kafshët, dy shtetas gjermanë dhe një polak, u arrestuan nga një njësi e specializuar e policisë që heton krimet kundër mjedisit. Ndaj tyre pritet të nisë një procedim penal nga prokuroria peruane.

Tarantulat janë ndër speciet e kërkuara në tregun ilegal evropian të kafshëve ekzotike. Një ekzemplar i vetëm mund të shitet për deri në 500 euro, duke e kthyer trafikimin e tyre në një aktivitet fitimprurës për rrjetet kriminale.

Fenomeni është pjesë e një problemi shumë më të gjerë ndërkombëtar. Sipas vlerësimeve të Interpolit, trafikimi i paligjshëm i kafshëve të egra dhe krimet e tjera kundër mjedisit gjenerojnë rreth 20 miliardë dollarë në vit në të gjithë botën, duke e renditur këtë aktivitet mes bizneseve më fitimprurëse të paligjshme.