Qeveria miraton vendime të reja/ Kompensim për linjat e transportit, kategori të reja për strukturat akomoduese dhe 3 projektligje

Këshilli i Ministrave ka zhvilluar këtë të enjte mbledhjen e radhës, gjatë së cilës janë marrë disa vendime.

Bëhet me dije se qeveria ka miratuar vendimin për përcaktimin e procedurave, të dokumentacionit dhe të masës së kompensimit për shoqëritë e linjave të transportit qytetës, rrethqytetës dhe ndërqytetës, në kushtet e situatës së veçantë në tregun e hidrokarbureve.

Sot u miratua vendimi për miratimin e masës së mbështetjes financiare për kujdesin alternativ në familje, si dhe të pagesës për kujdesin alternativ profesional.

Gjithashtu, VKM përfshin vendimin për përcaktimin e kategorive të strukturave akomoduese, si edhe për klasifikimin e produkteve të konsumit individual sipas qëllimit (COICOP 2018).

Njëherësh u miratuan edhe tre projektligje, në këto fusha: 

Për Kontabilitetin në Sektorin Publik.

Për ratifikimin e Marrëveshjes Evropiane për Heqjen e Vizave për Refugjatët, bërë në Strasburg, më 20.4.1959 (ETS 31).

Për disa shtesa dhe ndryshime në ligjin nr. 162/2020, “Për prokurimin publik”, të ndryshuar.