16 vite nga zhdukja e Bleona Matës, për herë të parë reagon SPAK

Çështja e Bleona Matës, e cila rezulton e zhdukur prej 16 vitesh, u rikthye në vëmendje në emisionin “Ftesë në 5”. Në studio u përballën nëna e Bleonës, Bukurie Mata, dhe avokati Alban Duraj. Ky i fundit deklaroi se ka komunikuar me zonjën Bukurie dhe se di se ku ndodhet vajza.

Deklarata u kundërshtua nga nëna e Bleonës, e cila tha se nuk e njeh avokatin dhe i kërkoi që të tregojë të vërtetën dhe të bëjë një punë të pastër.

Në emision ishte i ftuar edhe avokati i familjes, Idajet Beqiri, i cili deklaroi se çështja është në SPAK që prej vitit 2024 dhe se aktualisht është e pezulluar.

 Sipas tij, rasti fillimisht është hetuar nga Prokuroria e Kukësit dhe më pas nga Prokuroria e Krimeve të Rënda, për t’u kaluar në kompetencën e SPAK.

Moderatorja Bieta Sulo bëri të ditur se redaksia kishte kërkuar informacion zyrtar nga SPAK. Në përgjigjen e dhënë më 19 mars 2026, SPAK sqaron se, pas verifikimeve, nuk rezulton të ketë çështje të regjistruar për Bleona Matën. 

Avokati Beqiri e kundërshtoi këtë përgjigje, duke këmbëngulur se çështja është trajtuar nga organet e drejtësisë dhe se ekziston një vendim i marrë nga prokurori Anton Martini. 

Sipas tij, çështja është rikualifikuar për hetim nën dyshimin e trafikimit të qenieve njerëzore.