Zjarr në banesën në Sarandë, dy të moshuarit dërgohen në spital

Një zjarr ka përfshirë një banesë në lagjen nr. 1 të Sarandës gjatë orëve të para të mëngjesit, duke shkaktuar lëndimin e dy të moshuarve.
 
Ngjarja është regjistruar rreth orës 01:15, ndërsa si pasojë e flakëve kanë pësuar asfiksi dhe janë lënduar lehtë çifti i të moshuarve, Kristaq Zhupali, 83 vjeç, dhe Ksanthipi Zhupali, 72 vjeç.

Dy të moshuarit janë transportuar në Spitalin e Sarandës, ku kanë marrë ndihmën e nevojshme mjekësore.Në vendngjarje kanë ndërhyrë shërbimet zjarrfikëse, të cilat kanë bërë të mundur izolimin e vatrës dhe shuarjen e zjarrit.

Nga të dhënat paraprake dyshohet se zjarri është shkaktuar nga një defekt në sobën e gatimit. Ndërkohë, policia ka nisur hetimet për të zbardhur rrethanat e plota të ngjarjes.