Vr'au gruan e djalin dhe pl'agosi rëndë vajzën, 59-vjeçari dënohet me burgim të përjetshëm në Itali

Salvatore Ocone është dënuar me burgim të përjetshëm për vrasjen e gruas së tij dhe djalit 15-vjeçar në Paupisi, në provincën e Beneventos.

 Vrau gruan e djalin me gur si dhe plagosi rëndë vajzën, 59-vjeçari dënohet me burgim të përjetshëm në Itali
  
Vendimi i gjykatës u dha më 30 shtator 2026, saktësisht një vit pas krimit të rëndë, i cili ndodhi më 30 shtator 2025. 59-vjeçari u shpall fajtor për vrasjen e bashkëshortes së tij, Elisa, 49 vjeç, dhe djalit Cosimo, 15 vjeç, ndërsa vajza e tyre e mitur mbeti e plagosur rëndë.

Gjykata pranoi kërkesën e prokurorit të Republikës në Benevento, Nicola D’Angelo, për dënimin maksimal.

Si ndodhi krimi?

Sipas rindërtimit të ngjarjes, Ocone fillimisht sulmoi gruan e tij në banesë, duke e goditur në kokë me një gur të madh dhe duke e vrarë.

Më pas, ai sulmoi edhe fëmijët. Trupat u futën në automjetin me të cilin ai tentoi të largohej nga zona. Ocone u arrestua një ditë më vonë, rreth 70 kilometra larg Paupisit, pasi u gjet i fshehur në një ullishte në Ferrazzano, në provincën e Campobassos.

Kur mbërritën forcat e rendit, në automjet u gjetën dy fëmijët. Djali 15-vjeçar kishte ndërruar jetë, ndërsa vajza, e cila në atë kohë ishte 16 vjeçe, kishte pësuar frakturë të kafkës dhe ndodhej në gjendje shumë të rëndë.

Ocone kishte pranuar autorësinë e krimit pas arrestimit dhe ishte dërguar në burgun e Campobassos. Ai akuzohej për vrasje të dyfishtë të rënduar, tentativë vrasjeje dhe rrëmbim personi.