Vra'sja e Gjovalin Lazrit në Itali / Pesë orë ekspertizë në vendngjarje, dalin detaje të reja

Më shumë se pesë orë ka zgjatur të martën ekspertiza balistike në një banesë në rikonstruksion në Baldissero d’Alba, ku natën mes 19 dhe 20 shtatorit u vra Gjovalin Lazri, 36-vjeçari me origjinë shqiptare, banues në Torino.

Ekspertët rikrijuan disa herë të shtënën që rezultoi fatale, me qëllim përcaktimin e trajektores së plumbit, këndit dhe distancës së qitjes, si edhe pozicionit të viktimës në momentin kur u qëllua. Në vendngjarje u kryen edhe prova për të verifikuar përputhjen mes trajektores dhe vendndodhjes së gëzhojave.

Sipas rezultateve të autopsisë, Lazri është goditur nga një plumb i vetëm në zonën mes qafës dhe shpatullës. Ai u gjet në hyrje të oborrit të banesës. Tashmë ekspertët po përpiqen të përcaktojnë me saktësi se nga cili pozicion është qëlluar dhe nëse viktima ishte në lëvizje në momentin e goditjes.

Për ngjarjen është nën hetim Roberto Mollo, 35 vjeç, pronari i banesës. Sipas rindërtimit të deritanishëm, ai kishte dëgjuar zhurma në oborr dhe kishte dalë në ballkon, nga ku qëlloi me një pistoletë Steyr 9x21. Lazri dyshohet se ishte pjesë e një grupi që kishte hyrë në pronë në tentativë për vjedhje.

Prokuroria e Asti-t ka caktuar ekspertin balistik Stefano Conti për të kryer analizat. Në ekspertizë kanë marrë pjesë edhe ekspertët e caktuar nga mbrojtja e Mollo-s dhe nga familja e Lazrit. Hetimi duhet të sqarojë edhe nëse të shtënat dhe pozicioni i viktimës janë në përputhje me versionet e palëve.

Mollo vijon të hetohet në gjendje të lirë, ndërsa autoritetet po përpiqen të përcaktojnë me saktësi dinamikën e të shtënave dhe nëse ekzistojnë elemente që lidhen me vetëmbrojtjen apo përgjegjësinë penale për vrasjen.