Tufa dronësh ukrainas dhe balona misterioze, hapësira ajrore e Moskës në kaos, Putin ngel “në ajër”

Kërcënimet nga dronët ukrainas dhe raportimet për balona zbuluese detyruan autoritetet ruse të vendosnin kufizime në katër aeroportet kryesore të kryeqytetit. Dy avionë të lidhur me udhëtimin e presidentit rus raportohet se u devijuan drejt Shën Petersburgut.

Kaosi ka përfshirë katër aeroportet kryesore të Moskës, pas kërcënimeve nga dronët ukrainas dhe raportimeve për praninë e balonave zbuluese në hapësirën ajrore pranë kryeqytetit rus. Situata ka shkaktuar anulimin ose vonesën e të paktën 350 fluturimeve, duke prekur edhe avionët e përfshirë në udhëtimin e presidentit Vladimir Putin.

Sipas mediave të huaja, autoritetet ruse vendosën kufizime të përkohshme në aeroportet Vnukovo, Sheremetyevo, Domodedovo dhe Zhukovsky, për shkak të aktivitetit të shtuar të dronëve.

Kryebashkiaku i Moskës, Sergei Sobyanin, deklaroi se sistemet ruse të mbrojtjes ajrore kishin rrëzuar 15 dronë që po i afroheshin qytetit. Ndërkohë, banorë në disa zona jugore të kryeqytetit raportuan shpërthime dhe aktivizimin e sistemeve kundërajrore.

Devijohet drejt Shën Petersburgut flota e lidhur me Putinin

Ndërprerjet në trafikun ajror duket se kanë ndikuar edhe në udhëtimin e presidentit rus, i cili po kthehej nga Turkmenistani.

Sipas gazetës britanike “The Sun”, mbyllja e hapësirës ajrore bëri që avionët që shoqëronin Putinin dhe zyrtarë të tjerë të kërkonin alternativa për destinacionin e tyre.

Të dhënat e gjurmimit të fluturimeve treguan se avioni presidencial dhe avionët shoqërues ndodheshin mbi Moskë. Dy prej tyre raportohet se ndryshuan itinerarin dhe u drejtuan për në Shën Petersburg.

Megjithatë, deri më tani nuk është bërë e qartë se në cilin avion ndodhej Putin në momentin e devijimit.

Vnukovo, aeroporti më i prekur nga kufizimet

Sipas të dhënave të platformës Flightradar24, aeroporti Vnukovo regjistroi ndikimin më të madh nga kufizimet. Mbi 40% e fluturimeve pësuan vonesa, me një mesatare prej 102 minutash, ndërsa rreth 10% u anuluan.

Masat u vendosën rreth orës 15:40 me orën lokale, pas ndërprerjeve të mëparshme gjatë natës në aeroportet Vnukovo, Domodedovo dhe Zhukovsky. Kufizimet e para u hoqën rreth orës 07:00 të mëngjesit, por Zhukovsky pezulloi më pas operacionet edhe në dy raste të tjera.

Mbi 150 fluturime kishin pësuar vonesa gjatë natës, ndërsa numri i përgjithshëm i fluturimeve të anuluara ose të vonuara gjatë ditës arriti në të paktën 350.

Ndërkohë, autoritetet në rajonin e Jaroslavlit, në verilindje të Moskës, njoftuan se po vijonin përpjekjet për neutralizimin e balonave të vogla zbuluese që dyshohet se ishin nisur nga Ukraina.

Ngjarjet pasqyrojnë ndikimin që kërcënimet e përsëritura me dronë ndaj territorit rus po ushtrojnë mbi trafikun ajror, duke shkaktuar ndërprerje të konsiderueshme edhe në aeroportet kryesore të kryeqytetit.