Ndeshja kundër Polonisë në “Air Albania”, FSHF ka një lajmërim të rëndësishëm për tifozët

Sot Shqipëria do presë në “Air Albania” Poloninë, ndeshje e vlefshme për kualifikueset e Botërorit në 2022. Lidhur me këtë ndeshje, Federata Shqiptare e Futbollit ka njoftuar tifozët shqiptar për disa rregulla, duke nisur nga hyrja në stadium dhe sendet që u lejohet të mbajnë.

“Federata Shqiptare e Futbollit dëshiron të njoftojë të gjithë tifozët shqiptarë që do të jenë të pranishëm mbrëmjen e sotme në stadiumin kombëtar “Air Albania” për të ndjekur ndeshjen “Shqipëri – Poloni”, e vlefshme për kualifikueset e Kampionatit Botëror “Katar 2022” mbi orarin e hyrjes së tyre në stadium dhe mbi një pjesë të materialeve që nuk do të lejohen të mbahen me vete në stadium.

Hyrja e tifozëve do të fillojë në ora 18:00; Të gjithë personat që janë të pajisur me biletë, duhet të kenë me vete dokumentin e identifikimit si dhe nuk do të lejohen fëmijët nën moshën 16 vjeç, të cilët janë të pashoqëruar nga prindërit; Nuk do të lejohen disa sende si, sende të forta, bidonë uji, çadra, çelësa metalik apo lëndë piroteknike etj; Lejohet vetëm flamuri zyrtar shqiptar.

Duke ju falenderuar për mbështetjen e pakufishme që i jepni gjithmonë ekipit Kombëtar shqiptar, shpresojmë në mirëkuptimin tuaj dhe në mbështetjen tuaj të përhershme”, shkruhet në njoftimin e FSHF-së.