Nga akrepat te numrat: Si po zbehet ora tradicionale në epokën digjitale

Orët analoge po largohen gradualisht nga përdorimi i përditshëm, jo sepse kanë humbur funksionin e tyre, por për shkak të dominimit të ekraneve digjitale në jetën moderne.

Në shkolla dhe ambiente publike, ora me akrepa po zëvendësohet gjithnjë e më shpesh nga format digjitale, ndërsa brezat e rinj rriten të rrethuar nga telefona inteligjentë, tableta dhe pajisje elektronike që shfaqin kohën në mënyrë numerike.

Sipas vëzhgimeve në disa sisteme arsimore, shumë nxënës sot hasin vështirësi në leximin e orëve analoge, pasi janë rritur kryesisht me telefona inteligjentë dhe pajisje me ekrane digjitale. Koha në format digjital është më e shpejtë për t’u lexuar, por ekspertët paralajmërojnë se heqja dorë nga ora analoge mund të ketë ndikim në zhvillimin e disa aftësive të rëndësishme.

Ndryshe nga ora digjitale që kërkon vetëm njohjen e numrave, ora analoge kërkon interpretimin e lëvizjes së akrepave, këndeve dhe marrëdhënieve hapësinore. Ky proces lidhet me zhvillimin e aftësive si përqendrimi, kujtesa, vlerësimi i kohës dhe kuptimi i thyesave.

Pedagogët theksojnë se ora analoge mbetet një mjet i thjeshtë, por me vlerë didaktike, sidomos në ciklin fillor, ku nxënësit ndërtojnë bazat e të menduarit logjik dhe matematikor.

Në një kohë kur teknologjia po përcakton ritmin e përditshmërisë, debati mbetet i hapur nëse sistemi arsimor duhet të ruajë përdorimin e orëve analoge si pjesë të procesit mësimor, apo nëse koha digjitale do të mbizotërojë plotësisht në brezat e ardhshëm.ORA