Shpërthimi në Elbasan/ Pezullohet kërkimi për 69-vjeçarin e zhdukur, shkak rrezikshmëria e ndërtesës (VIDEO)

Ekspertët nga Ministria e Mbrojtjes vendosën që të pezullojnë për sotë operacionin për kërkimin e personit që është raportuar i zhdukur nga shpërthimi në pallatin në Elbasan.

Shkak për pezullimin u bë rrezikshmëria që paraqet ndërtesa. 69-vjeçari Hamit Ibro është pronari i apartamentit në katin e tretë ku dyshohet se nisi shpërthimi.

Teksa operacionet e kërkimit për gjetjen e 69-vjeçarit që ndodhet ende nën rrënojat e pallatit  që u shkatërrua nga shpërthimi i sotëm në Elbasan do vazhdojë nesër, në terren ka mbërritur edhe Komandanti i Bazës së Mbështetjes dhe Emergjencave Civile, Kolonel Hajdar Gurra.

Komandanti Gurra tha se nga kamerat termike që janë përdorur gjatë kërkimeve, ka pak gjasa që 69-vjeçari të gjendet i gjallë

“Në terren janë dy ekipe kërkim shpëtimi, 16 persona me të gjitha mjetet e nevojshme.

Operacioni paraqet rrezikshmëri shumë të lartë pasi godina është tërësisht e shkatërruar. 

Do të vijojmë kërkimet deri në fund duke ruajtur të gjithë parametrat e sigurisë për punonjësit tanë.

Nga kamerat termike që kemi përdorur, ka shumë pak gjasa që 69 vjeçari Hamit Ibro të gjendet i gjallë.

Jemi duke kërkuar në pjesën e godinës ku sipas informacioneve të familjarëve dhe strukturave vendore, mendohet të ketë qenë personi”, u shpreh Gurra.

VIDEO