Rënie e lindjeve në Shqipëri, INSTAT zbulon sa foshnja erdhën në jetë këtë vit

Publikimi i të dhënave për tremujorin e tretë jep tashmë një panoramë më të plotë të lindjeve në Shqipëri gjatë vitit 2026. Në nëntë muajt e parë janë regjistruar gjithsej 16,016 lindje. Edhe këtë vit, korriku-shtatori rezulton periudha me më shumë lindje deri tani, duke ruajtur modelin sezonal të viteve të mëparshme. Megjithatë, krahasuar me nëntëmujorin e vitit 2025, numri i lindjeve ka rënë me 4.7%, ose 789 më pak.

Një analizë e të dhënave të INSTAT për periudhën 2011-2025 zbulon se në 14 nga 15 vitet, tremujori i tretë ka regjistruar numrin më të lartë të lindjeve në Shqipëri. I vetmi përjashtim është viti 2019-të, kur më shumë fëmijë lindën gjatë tetorit-dhjetorit.

Përgjatë 15 viteve, mesatarisht 28.1% e lindjeve vjetore kanë ndodhur gjatë korrikut, gushtit dhe shtatorit. Tremujori i katërt renditet i dyti, me 25.6%, i ndjekur nga prilli-qershori me 23.5% dhe janari-marsi me 22.8%.

Ky model sezonal vërehet edhe në të gjitha qarqet, kur analizohen të dhënat e përmbledhura të periudhës 2011-2025, megjithëse ka dallime territoriale.

Durrësi ka përqendrimin më të lartë të lindjeve gjatë tremujorit të tretë, me 28.6% të totalit 15-vjeçar, i ndjekur nga Elbasani me 28.4% dhe Vlora me 28.3.

Tirana, Korça dhe Vlora paraqesin modelin më të qëndrueshëm, pasi korriku-shtatori ka kryesuar në 14 nga 15 vitet, ndërsa në Gjirokastër, kjo ka ndodhur vetëm në nëntë vite.

Dallimet shfaqen edhe në periudhat e tjera. Në nëntë qarqe, tetori-dhjetori është tremujori i dytë me më shumë lindje, ndërsa në Dibër, Korçë dhe Kukës këtë pozicion e zë prilli-qershori.

Të dhënat tregojnë se periudha e pikut të lindjeve mbetet relativisht e qëndrueshme, por numri i fëmijëve që lindin në Shqipëri është tkurrur ndjeshëm. Nga 34,232 lindje në vitin 2011, vendi regjistroi vetëm 22,541 në vitin 2025, një rënie prej 34.2%.