Pse konsiderohet e premtja data 13 ditë ters? Katër ngjarjet që tronditën Amerikën

Për të gjithë ata që besojnë tek bestytnia që vjen nga një legjendë e vjetër se e Premtja e datës 13 është një ditë tersi, dje ishte rasti perfekt për ta besuar. Në të vërtetë katër ngjarje të pazakonta ndodhën në Shtetet e Bashkuara të Amerikës dhe këto mjaftuan për të shpërthyer në rrjete sociale teoritë konspirative.

Përplasja e tanker-it në New Orleans, ndalimi i fluturimeve në SHBA, shpërthimi i Starship i SpaceX dhe stuhia e fortë që goditi qytetet nga Philadelphia, në New York e Boston shkaktuan frikë dhe pasiguri te miliona qytetarë amerikanë. Fatmirësisht asnjë nga këto ngjarje nuk shkaktoi viktima. Sekretari i Sigurisë Kombëtare të SHBA, Markwayne Mullin tha në një konferencë për shtyp: “Falë hirit të Zotit, nuk humbëm asnjë jetë”.

Përplasja në New Orleans

Tanker-i Atlantic Asphalt humbi kontrollin dhe u përplas me anijen turistike American Heritage që ishte e ankoruar në lumin Mississippi. Anija turistike u fundos dhe pasagjerët ranë në ujë. Në bordin e anijes ndodheshin 190 njerëz. Të gjithë u shpëtuan, vetëm 32 prej tyre u transportuan në spital, por askush nuk ishte në gjendje kritike për jetën. Kryetarja e bashkisë e quajti ngjarjen “Mrekullia në Mississippi”.

Anulimi i fluturimeve

Nuk kishte ndodhur prej 11 Shtatorit, por Administrata Federale e Aviacionit (FAA) urdhëroi dje në mënyrë të papritur ndërprerjen për rreth 4 orë e 21 minuta të të gjitha fluturimeve ajrore. Mbi 11.000 fluturime ajrore në SHBA u anuluan. Ngjarja mori menjëherë vëmendjen e medias ndërkombëtare, në rrjet u fol për një sulm kibernetik, por në fakt duket se bëhej fjalë për një defekt të pajisjeve të vjetra.

Shpërthimi i Starship i SpaceX

Në orën 16:47 në Teksas, SpaceX lëshoi fluturimin e 15-të të Starship. 3 minuta pas nisjes, raketa 124 metra e gjatë u nda në dy pjesë, anija që vazhdoi lart dhe boosteri që duhej të binte dhe të rikthehej në kullë. Por sistemet e sigurisë konstatuan një defekt, që do ta bënte rikthimin e booster-it të pasigurt në kullë. Për këtë arsye, SpaceX e devijoi rënien e booster-it në Gjirin e Meksikës, i cili shpërtheu në ajër vetëm pak metra para se të binte në det. Në rast se booster-i do të shpërthente në kullën e SpaceX nga ku ishte nisur, do të kishte humbje jete njerëzish, do të shkaktoheshin dëme miliarda dollarëshe të sistemeve kompjuterike në kullë dhe gjithashtu do ta bënte të pamundur funksionimin e SpaceX për të paktën një muaj.

Stuhia bregdetare

Stuhia e fortë bregdetare “Nor’easter”, e cila vinte nga Oqeani Atlantik, goditi bregun lindor të SHBA-ve. U prekën qytetet nga Philadelphia në New York e Boston. Breshër, borë, vetëtima dhe erë e fortë. Në New Jersey pati dhe tornado. U përmbytën rrugë dhe 11.000 shtëpi mbetën pa energji elektrike. Por për fat të mirë, nuk pati asnjë viktimë.