Xhaferi në zyrat e shtetit, s’kursen zyrtarët shqiptarë: Pse i lini njerëzit në radhë

Burime nga kryeministria e Maqedonisë së Veriut bëjnë me dije se kryeministri shqiptar Talat Xhaferi ka vendosur të inspektojë shumë institucione shtetërore për të parë se në çfarë gjendje ndodhet administrata si dhe a funksionojnë si duhet.

Ky kontroll personalisht nga kryemnistri i Maqedonisë së Veriut po bëhet pasi ka shumë akuza dhe kritika se shumë administratorë nuk shkojnë fare në vendin e punës.

Ditën e sotme kryeministri i Maqedonisë së Veriut, Talat Xhaferi vizitoi qendrën ku jepen pasaportat në Tetovë.

Pasi ka inspektuar qendrën ai ka pasur kritika të ashpra ndaj punonjësve pasi puna ecte ngadalë dhe radha e qytetarëve të cilët prisnin të pajiseshin me dokumentacion ishte shumë e madhe.

Xhaferi i ka kërkuar llogari shefit dhe të punësuarve në sektorin e dokumentave. Në një moment duket se Xhaferi pikas një nga të punësuar në zyrë, duke e mashtruar se ka punë, por kryeministri e largon nga zyra me nervozizëm.

Xhaferi: Ku e ke vendin e punës?

Zyrtari: Vendin e punës e kam këtu

Xhaferi: Po ç’bën këtu?

Zyrtari: Kam ardhur për disa dokumente

Xhaferi: Çfarë dokumenti? Shko te vendi i punës, se s’ke punë me dokumente, ti nuk ke punë zyrtare këtu, ti ke ardhur këtu për të pirë kafe.

Xhaferi ka pasur kritika të forta për kryeshefin e sektorit të dokumentave, Artan Nesimi në lidhje me procesin e ngadaltë në qendrën ku jepen pasaportat në Tetovë. Ai madje pyet zyrtarët se “Kush është shefi këtu?”

“Ka mungesë organizimi për kryerjen e detyrave në nivel ditor dhe institucioni përkatës në aspekt organizativ do të duhet bën përpjekje që pranimi i dokumenteve të jet në një formë dhe dhënia e dokumenteve të gatshme në formë tjetre”, – tha kryeministri Xhaferi në një deklaratë të bërë më pas.

Zëvendësimi i dokumenteve personale, pasaportave, letërnjoftimeve me emrin “Maqedonia e Veriut”, është detyrim për banorët, bazuar në Marrëveshjen e Prespës, ndërmjet Shkupit dhe Athinës për ndryshimin e emrit të shtetit, që ishte arritur në qershor të vitit 2018.