Spartak Ngjela paralajmërim të fortë: Meta kërkon azil politik në Hungari, Rama po e pengon

Avokati Spartak Ngjela ka komentuar ditën e sotme, vizitën e kryeministrit Edi Rama drejt Hungarisë. Në një shkrim të gjatë, Ngjela shprehet se pas kësaj vizite fshihet një lëvizje diplomatike e mundshme e Ramës për të penguar azilin e Presidentit Ilir Meta drejt Hungarisë.

Avokati i njohur shton se Meta është mik me Nikola Gruevski, ish kryeministrin e Maqedonisë së Veriut, i cili ndodhet me azil politik në Hungari dhe një lëvizje e ngjashme mund të ndodhë në të ardhmen nga presidenti i vendit.

Ngjela, shkruan se Rama ka nisur politika amerikane, pikërisht për Metën, me detyrë diplomatike kundrejt kryeministrit aktual të Hungarisë, për mospranimin e azilit politik që mund të kërkojë Ilir Meta

Postimi i plotë i Spartak Ngjelës

Rama vizitë urgjente dhe të paparashikuar, në Hungari.

Përse ky ngut për në Budapest?

Ja çështjet që mund të ngrihen brenda saj:

Nikola Gruevski, ish kryeministri i Maqedonisë së Veriut, ndodhet me azil politik në Hungari, dhe shkoi atje, pasi u dënua për korrupsion nga gjykata e Shkupit;

Meta është mik i Gruevskit; kjo dihet botërisht.

Edhe Meta, presidenti aktual i Shqipërisë, është duke shkuar drejt procesit penal, njëlloj si Gruevski.

Por…

Edhe Gruevski edhe Meta janë antiamerikanë.

Po Rama, çfarë po kërkon në Hungari?

Siç duket e ka nisur politika amerikane, pikërisht për Metën, me detyrë diplomatike kundrejt kryeministrit aktual të Hungarisë, për mospranimin e azilit politik që mund të kërkojë Ilir Meta.

A do të dalë me sukses kërkesa anti-Meta e Ramës në Hungari?

Gjithsesi, tani një gjë është e sigurt: shkarkimi i Metës është çështje ditësh.

Po, misioni i Ramës?

Të shohim… Por, unë jam i bindur se në Budapest ai ka shkuar sipas kërkesës amerikane për të takuar kryeministrin e Hungarisë Viktor Orban, në lidhje me Metën.

“Kërkesë” kjo, të cilën Rama mund ta servirë me një kërcënim diplomatik të politikës amerikane.

Të shohim…