Noka bie ndesh me Bashën, akuzon Ramën se ka kopjuar programin e shëndetësisë nga PD

Kandidati për deputet në listën e PD, në Tiranë, Flamur Noka, ka akuzuar kryeministrin e vendit, Edi Rama. Në një intervistë televizive, Noka tha se Edi Rama ka kopjuar programin e PD për shëndetësinë.

“Edi Rama është një kopjac. Ai në fillim e hodhi poshtë programin tonë me 5 pika për rimëkëmbjen e shëndetësisë dhe tani po e zbaton”, tha ai.

Ndërkohë që deklarata e tij, bie ndesh me deklaratën e kryedemokratit, Lulzim Basha, i cili disa ditë më parë, në një takim me mjekët dhe ekspertë të shëndetësisë, Basha akuzoi qeverinë për keqmenaxhim të situatës.

Kujtojmë se Basha tha se keqmenaxhimi i pandemisë sa vjen e rëndon mbi supet e shqiptarëve, ndërsa ka hedhur akuza se në fakt janë duke u fshehur faktet dhe shifrat reale të koronavirusit në vend. Tani, një gjë është e paqartë. Nëse Rama ka kopjuar programin e PD siç thotë Noka, atëherë kjo parti nuk di të hartojë një plan të suksesshëm ashtu siç deklaron Basha.