Lapaj thirrje për pjesëmarrje në protestë: Më 4 janar nuk do të tresim bakllavanë, por regjimin

Kreu i “Shqipëria Bëhet”, Adriatik Lapaj, ka mbajtur sot përpara kryeministrisë një fjalim, duke e cilësuar situatën në vend si një “mekanizëm monstruoz” që, sipas tij, ka kapur Shqipërinë si kancer.

Lapaj u shpreh se asnjë qytetar i vetëm nuk mund ta rrëzojë këtë sistem, por theksoi se qëndresa individuale në krah të së drejtës, e bashkuar çdo ditë, do të japë frytet e veta.

“Secili nga ne është një milingonë përballë një mekanizmi monstruoz si ky, por duke u shtuar çdo ditë, ne kemi mbjellë një farë që do të japë frytet e veta”, deklaroi ai.

Duke iu referuar protestës së paralajmëruar, Lapaj tha se më 4 janar qytetarët nuk do të festojnë, por do të jenë në shesh për të kundërshtuar qeverinë.

“Në datën 4 janar nuk do të tresim bakllavanë, por do të jemi duke tretur regjimin”, u shpreh ai.

Lapaj ironizoi edhe daljen e fundit publike të kryeministrit Rama, pas një mungese disa javore, duke thënë se propaganda e tij nuk po funksionon më. Ai reagoi edhe ndaj deklaratës së Ramës, i cili i ka quajtur protestuesit “700 tenxherexhinj të llumit”.

“Sot na quajti 700 tenxherexhinj që duan të destabilizojnë Shqipërinë. Tenxherexhinj janë ata që vjedhin atdheun, tenxherexhinj janë ata që vjedhin lekët e ilaçeve të qytetarëve”, theksoi Lapaj.

Fjala e Lapajt:

“Secili nga ne është një milingonë përballë një mekanizmi monstruoz si ky, dhe asnjë nga ne I vetëm nuk mund ta zhbëjë këtë kancer që e ka kap SHqipërinë, por padiskutim që qendresa e secilit nga ne në krah të së drejtës është një dëshmi ndaj të të madhit zot.

Duke u shtuar cdo ditë, ne kemi mbjellë një farë që do të japë frytet e veta. Në datën 4 janar janar nuk do të tresim bakllavanë por do të jemi duke tretur regjimin. Pas 3 javësh mbreti hajdut ka dalë dhe ka fol sot.

Kishte 3 javë që bëlbëzonte dhe nuk flistë më sic më parë ndodhte që na dilte dhe ne kanatën e frigoriferit. Ka dalë 3 javë që nuk I del kollaj zëri, ka 3 javë që nuk I ngjit më propaganda. Sot kishte dalë dhe na kishte quajtur 700 tenxherexhijë e llumit që duan të destabilizojnë Shqipërinë.

Por tenxherixhinj janë ata që vjedhin atdheun, tenxherixhinj janë ata që vjedhin lekët e ilaceve të atdheut.”