Ngordhin peshqit gjatë rikonstruksionit të digës në Lushnjë, procedohet administratori

Një 58-vjeçar, administrator i një firme që po kryen punime për rehabilitimin e digës dhe shkarkuesit të liqenit në fshatin Kasharaj të Lushnjës, është proceduar penalisht pas ngordhjes së një numri të konsiderueshëm peshqish.

Sipas Policisë, specialistët për Hetimin e Krimeve të Komisariatit të Policisë Lushnjë kanë referuar materialet në Prokurori, ku ka nisur procedimi penal për shtetasin F. M., 58 vjeç, administrator i kompanisë që po kryen punimet për rikonstruksionin e digës së dëmtuar.

Procedimi penal ka nisur pasi, gjatë punimeve, kompania që administron 58-vjeçari dyshohet se nuk ka marrë masat e duhura për menaxhimin e ujërave të rezervuarit. Si pasojë, ka ngordhur një numër i konsiderueshëm peshqish.

Policia bën me dije se vijojnë hetimet për dokumentimin e plotë të rrethanave të rastit.

Materialet procedurale i janë referuar Prokurorisë së Fierit për veprime të mëtejshme, për veprat penale “Dëmtimi i habitateve në zonat e mbrojtura mjedisore” dhe “Ndotja e ajrit, ujërave dhe e tokës”.