Kurti homazhe në Prekaz: Serbia ende nuk e ka marrë dënimin për këtë krim

Ditën e sotme, kryeministri i Kosovës Albin Kurti, ka bërë homazhe në Kompleksin Memorial “Adem Jashari” në Prekaz. Gjatë fjalës së tij, ai ka treguar se shteti serb ende nuk e ka marrë dënimin për krimin që ka bërë 22 vite më parë në Kosovë dhe se gjaku i tyre nuk humbet kurrë dhe se emri i tyre nuk mund të harrohet.

 “Prekazi tregon më së miri se nga vijmë dhe se ku duhet të shkojmë. Dje pranuam detyrën si qeveri e re e cila u votua në Kuvendin e Republikës së Kosovës dhe sot në ditën e parë të punës erdhëm herët në Prekaz në këtë vend të flijimit e të bashkimit, ku tre breza të familjes Jashari u vranë nga forcat serbe mirëpo rënia e tyre heroike e ngriti në këmbë popullin shqiptar, i dha hov ushtrisë çlirimtare të Kosovës dhe zgjoi ndërgjegjen ndërkombëtar, e cila më 24 mars 1999 dërgoi aleancën më të fuqishme të historisë së njerëzimit kundër një shteti gjenocidal siç ishte Serbia e Millosheviçit”, tha Kurti.