Borrel: Zgjedhje të reja në veri, Serbia të lirojë tre policët e Kosovës

Përfaqësuesi i lartë i BE-së, Josep Borrell tha se në takimet që ka pati sot, veçmas, me Kryeministrin e Kosovës dhe Presidentin e Serbisë, është rënë dakord se duhet të ketë zgjedhje të reja në katër komunat veriore të Kosovës.

Borell deklaroi se i ka thënë Vuçiçit se tre policët e Kosovës që po mbahen në paraburgim në Serbi “duhet të lirohen menjëherë dhe pa kushte”.

Kryediplomati europian shtoi se pret nga palët që të ulin tensionet dhe të përmbushin detyrimet e tyre pa asnjë parakusht.

Sipas Radio Evropa e Lirë, Borrell shtoi se në takimin me Kurtin, ka ritheksuar kërkesën që kryetarët shqiptarë të zgjedhur në komunat serbe, të punojnë nga ndërtesa alternative.

Në lidhje me arrestimet e disa serbëve në Kosovë pas protestave të fundit në veri, Borell po ashtu tha se nuk mund të ketë mosndëshkim për autorët e dhunës.

Takimi me Kurtin

Shefi për Politikë të Jashtme e Siguri të BE-së, Josep Borrell,ka ftuar në takim në Bruksel kryeministrin e Kosovës, Albin Kurti e presidentin e Serbisë, Aleksandar Vuçiq, për të gjetur zgjidhjen në uljen e tensioneve në veri të Kosovës.

Borrell përmes rrjetit social Twitter ka bërë të ditur për ecurinë e takimit me Kurtin e Vuçiqin, të cilat janë zhvilluar të ndara.

Kështu, lidhur me takimin me kryeministrin Kurti, Borrell përmes Twitter u shpreh se situata në veri të Kosovës vazhdon të jetë shumë e tensionuar dhe që po synohet të gjendet një zgjidhje për uljen e menjëhershëm të tensioneve në veri të vendit, si dhe të ecet përpara.