I mori 15 mijë euro dhe e shantazhoi me foto nudo, arrestohet shqiptari në Greqi

Një 28-vjeçar shqiptar po hetohet nga policia greke, pasi akuzohet për mashtrim dhe shantazh ndaj një gruaje. 

Shqiptari është denoncuar nga një 44-vjeçare me origjinë polake, e cila pretendon se ai e ka mashtruar duke i marrë  rreth 15 mijë euro.

Sipas dëshmisë së 44-vjeçares, i riu e ka bindur atë, duke i paraqitur informacione dhe fakte të rreme, që t’i transferonte shuma të ndryshme parash në disa këste gjatë periudhës nga tetori 2024 deri në nëntor 2025.

Në total, gruaja pretendon se i ka dhënë 28-vjeçarit 15,417 euro. Kur kuptoi se informacionet që i ishin paraqitur nuk përputheshin me realitetin, ajo i kërkoi atij që t’i kthente paratë.

Por, në këtë moment, 28-vjeçari dyshohet se e ka kërcënuar gruan dhe i ka thënë se do t’u dërgonte të afërmve foto nudo të saj, të cilat pretendohet se i kishte në posedim. E frikësuar nga kërcënimet, 44-vjeçarja iu drejtua autoriteteve policore dhe bëri kallëzim për mashtrimin financiar dhe kërcënimet që pretendon se kishte marrë.

Pas denoncimit, policia e Rodosit ka proceduar penalisht 28-vjeçarin për mashtrim, kërcënime dhe pornografi për hakmarrje, ndërsa hetimet për rastin vijojnë.