Goditet trafiku i dro'gës, kapet në Marok i shumëkërkuari që drejtonte rrjetin e kan'abisit në Spanjë

Autoritetet kanë arrestuar në Tangier të Marokut personin e dyshuar si drejtuesi kryesor i një prej rrjeteve më të mëdha të trafikut të hashashit në Spanjë. Arrestimi erdhi pas një operacioni disa mujor, gjatë të cilit u vunë në pranga 86 persona dhe u sekuestruan rreth 10.8 tonë hashash. I dyshuari, Juan Carlos T. B., i njohur me nofkën “Moreno”, u arrestua më 8 tetor, në bazë të një urdhër-arresti ndërkombëtar, ndërsa po vijojnë procedurat për ekstradimin e tij në Spanjë.

Sipas hetimeve, organizata transportonte sasi të mëdha hashashi nga Maroku drejt brigjeve spanjolle, duke përdorur kryesisht Ngushticën e Gjibraltarit. Më pas, droga dërgohej në Madrid, ku ruhej përkohësisht në banesa dhe ambiente të marra me qira, përpara se të shpërndahej në qytete të ndryshme të Spanjës dhe në vende të tjera evropiane. Hetuesit zbuluan shtatë pika magazinimi dhe shpërndarjeje në Madrid, Guadalajara dhe Valencia.

Operacionet policore çuan në sekuestrimin e sasive të konsiderueshme të drogës në disa ambiente. Ndër konfiskimet më të mëdha ishte ai prej 4.6 tonësh hashash në një objekt industrial në Silla të Valencias. Në një banesë në zonën Las Tablas të Madridit u gjetën më shumë se 2.1 tonë hashash, ndërsa në operacione të tjera u sekuestruan edhe sasi të tjera droge. Hetimet kishin nisur në fillim të vitit 2025, pasi autoritetet zbuluan se drejtuesit e rrjetit përdornin aplikacione të enkriptuara për të koordinuar aktivitetin e tyre.

Sipas policisë spanjolle, organizata dyshohet se pastronte paratë e përfituara nga trafiku përmes kompanive fiktive, faturave të falsifikuara dhe transaksioneve financiare të kryera në emër të personave të tjerë. Një pjesë e fitimeve investohej në automjete luksoze dhe prona të paluajtshme, me qëllim fshehjen e origjinës së paligjshme të parave. Gjatë operacionit u sekuestruan gjithashtu 25 automjete, 15 ora luksoze dhe afro 466 mijë euro në para të gatshme.

Në total, autoritetet kryen 33 kontrolle në prona në disa qytete spanjolle, ndërsa përveç 10.8 tonëve hashash, sekuestruan mbi 21.8 kilogramë kanabis dhe disa armë. Nga 86 personat e arrestuar, 18 janë dërguar në burg. Të dyshuarit përballen me akuza për pjesëmarrje në organizatë kriminale, trafik droge dhe pastrim të parave. Hetimet vijojnë nën drejtimin e autoriteteve gjyqësore spanjolle, ndërsa nuk përjashtohen arrestime dhe sekuestrime të tjera.